NBA point nei hnem ber LeBron James

Basketball inelna ngaihhlut hlawh ber NBA huangah mellung pawimawh leh ropui bik phun a ni. LeBron James chuan nimin zing khan Kareem Abdul-Jabbar-a record khumin point nei hnem ber a ni ta.

Los Angeles Lakers star James hian Oklahoma City Thunder lakah point 38 a nei a, basketball inelna sang berah hian point a neih tawh zawng zawng belhkhawm chu 38,390 a ni a, kum 39 chhung record lo awm tawh (38,387 points) chu a khum.

James hian record thar siam tur hian point 36 a mamawh a, mimal chuan a khel ṭhain record thar pawh a siam. Mahse, a team Lakers hi Thunder lakah hian 133-130 in an chak lo a, a thiam zual pariat inelna playoff beiseina a tlem zel.

Record chu

Eng infiamna huangah pawh mi bik, a thiam leh thei fal bik an awm ṭhin - rei tak chhung khel thei an nih phei chuan ngaihhlut an hlawh zual ṭhin. James hian quarter thumna tawp dawnah, amah vengtu player pahnih hma aṭangin 2 points a lut a, record siamna a ni.

A ban pahnih phar chhuakin a mellung phun hi a lawm. Crypto.com Arena-ah Abdul-Jabbar pawhin inkhel a lo en, kum 75 mi ni tawh legend hian James-a hi ding chunga kut bengin a lo lawmpui a, inkhel an titawp lailawk hial.

Kum 38 mi James chuan lawmthu sawi zuiin, "Legend Kareem awm laia hetiang hun ka tawng thei hi ka tan chuan a hlu lehzual. Tun hnai kum 20 chhunga ka zinkawnga lo tel zawng zawngte in zaivai chungah lawmthu ka sawi tak meuh.

"Nangni tel lo chuan tun hun hi ka thleng thei lo tih ka hria, nangni hian chona min siamsak a, phurna min pein theihtawp chhuah lehzual turin min pui, hetiang zat point ka neih theih chhan chu min ṭantute vang a ni," tiin a sawi.

Lawmpuina

Kareem Abdul-Jabbar chuan basketball kengin James hnenah a pe chhawng a, kum 39 chhung zet record a lo chelh tawh rawn khumtu a lawmpui lai hian mipui thawm a ṭha rem rem hle, duhsakna thu a sawi zui nghal bawk.

New York mi, vawi ruk ngawt NBA champion ni thei Abdul-Jabbar chuan, "LeBron-a basketball zinkawng hi mi tam tak duhthusam a ni ngei ang. He infiamna tana a inpekna, a awp beh dan leh hma a sawn pui dan hian fak a phu hle.

"Player dangte pawhin he record hi engtik niah emaw chuan an rawn khum ang tiin ka ngaihtuah ṭhin, chu hun chu tunah hian a lo thleng. James hian hetiang dinhmun thlen hi a phu," tiin a record khumtu chu a dahsang thiam hle.

James-a'n record a siamna inkhel hi NBA commissioner Adam Silver pawhin a hmunah a en. Tennis legend John McEnroe bakah, rimawi lama mi bik Jay-Z, LL Cool J leh Bad Bunny te bakah lemchan thiam Denzel Washington pawhin a en a ni.

James zinkawng

LeBron James hi Akron, Ohio-a piang a ni a, he hmunah hian high school pawh a kal. Kum 2003 khan an khua Cleveland Cavaliers tan NBA zinkawng a zawh ṭan a, hemi aṭang hian hnung lam hawi leh tawh loin hma lam a pan zel.

James hian 2010 khan Miami Heat a zawm, he hmunah hian ṭum hnih a champion. Chumi hnuah Cleveland lamah a kir leh a, an khaw club hi 2016 kha a champion pui, hei bak chu NBA title dang an la nei lo - Cavs tan chuan a hlutna a sang hle.

Kum 2018 khan Lakers hi a zawm a, 2020 khan NBA title lakpuiin NBA finals MVP atan thlan a ni. An ram United States tan pawh Olympic gold medal vawi hnih a dawng tawh, basketball huangah chuan a sulhnu hi a ṭha vet vet hle.

NBA Most Valuable Player leh NBA Finals MVP atan vawi li ve ve thlan a ni tawh. James-a'n a khum tak Abdul-Jabbar hian season 20 chhung NBA a khel a, vawi ruk champion-in MVP atan ṭum ruk thlan a ni bawk.