Vawiin tlai dar 2-ah Aizawl FC vs Rajasthan

Aizawl FC chuan vawiin tlai dar 2:00 hian RG Stadium-ah Rajasthan an mikhual dawn a, Mizo club coach Caetano Pinho chuan Mizo mipuite a hmun ngeia ṭawiawm ṭheuh turin a ngen.

Mizo club hian January 26 khan RG Stadium-ah Mohammedan SC 1-0 in an hneh a, hemi zawh hian Real Kashmir hmachhawn tur ni mah se vur tlak nasat avangin an inkhel thei ta lo.

Aizawl FC hian Rajasthan an hmachhawn hma hian kar hnih ṭha inpuahchahna hun an nei a, January transfer-ah Belarus striker Ivan Veras an lalut thar bawk.

Belarusian striker Veras hian ṭum thum training a nei tawh a, Rajasthan lakah hian bul a ṭan la rinawm chiah lo mah se bench aṭanga a luh theih a rinawm.

Aizawl FC tan Mizo player-te an che ṭha ṭhin a, tlarhnungah captain Lalchhawnkima chu rinrawl niiin midfield-ah Lalramsanga, K. Lalrinfela leh Lalchhanhima Sailo te an ṭangkai ṭhin hle.

Mohammedan an hmachhawn ṭuma man of the match R. Lalthan-mawia'n a thawhrim rah a seng chho mek. Amawia hian season chawlh lai khan Keifang Centenary Sports Complex-ah a hranpain ball pet a zir a, tun season-ah a ke aṭanga ball chhuak a danglam ta hle.

Aizawl FC hian February 4, Inrinni khan Aijal club-ah club neitu Robert Romawia Royte, Sports Minister leh Board of Directors dangte nen infuih tharna hun an hmang a, rah ṭha a thlen em tih chu vawiin lamah a hriat ang.

Mizo club mikhual tur Rajasthan hian match hnuhnung pathumah an khingpuite an hneh lo vek a, chutihrualin Aizawl FC hian khualmualah 1-0 in an hneh lo tih hriat a ṭha. Rajasthan-ah hian Aizawl FC aṭanga inzir chhuak Lalrem-sanga Fanai-in hmun pawimawh a chang pha a, AFC leh Chanmari FC tana khel tawh Léonce Dodoz chu tlarhmaah a awm bawk.