Hero AIFF Futsal Championship ; Vawiinah Mizoram aiawh Electric Veng inlan dawn

Hero AIFF Futsal Club Championship chu nimin aṭangin KD Jadhav Hall, IG Sports Complex, Delhi-ah an khel ṭan. Vawiin hian Mizoram champion Electric Veng Futsal Club an inlan dawn a, zing dar 9:30-ah Dzawo 11 FC , Ladakh an hmachhawn dawn.

India rama futsal inelna sang berah hian team 14 an tel a, group pahnihah pasarih ve vein an inṭhen. Electric Veng FC hi group A-ah champion lai Delhi FC bakah Bengaluru FC, Sports Odisha, Dzawo FC, Techtro Swades United FC leh Speed Force FC te nen an awm ho.

Group B-ah inelna hnuhnung bera final-a vanduai Mohammedan SC bakah BPSS FC, Capital Complex FC, Minerva Academy FC, Goal Hunterz FC, Aphuyemi FC leh Juggernaut FC te an awm thung.

Nikum khan Mizoram aiawhin Chanmari Zothan Futsal an kal a, beisei angin an che ṭha lo. Mizo club hi Delhi-a indoor chhuatah an talbuai a, Covid-19 vanga coach-in a telpui theih loh bawk avangin group stage an paltlang zo lo.

Electric Veng erawhin hall ṭha tak an nei a, inpuahchahna ṭha tak an nei. February 2 khan Delhi an pan a, inelna neihna hmunah erawh training-na hmun an nei ṭha lo a, park leh hmun remchang laiah an taksa an insawizawi thung.

Electric Veng assistant coach F. Lalhmangaihsanga (Duata) chuan, "Mizoram tan theihtawp chhuahin kan inpuahchah. Eng result pawh thleng se, tun hun min hruai thlengtu Pathian chungah leh min ṭanpuitu zawng zawng chungah kan lawm hle. Mizo mipuite ṭawngṭaipuina kan ngen tak meuh a ni," tiin Vanglaini a hrilh.

Nimina inkhel hmasa berah Mizo player hlanga bul ṭan Delhi FC chuan Bengaluru FC 11-5 in an sawp.