CWC: Flamengo ngamtu Asian champion Al Hilal

FIFA Club World Cup semifinal hmasa zawk chu Thawhlehni zan khan khelh a ni a, Asian champion Al-Hilal chuan South American champion Flamengo chu 3-2 a hnehin final an lut.

Al-Hilal tan Salem Al-Dawsari chuan penalty aṭangin goal hnih a khung a, Luciano Vietto chuan goal khat a khung bawk - Flamengo tana Pedro goal hnih khungin awmzia a nei phak lo.

Nizan zanlaiah khan semifinal inkhel dangah Al-Ahly leh Real Madrid an inhmachhawn a, he thu buatsaih a nih lai hian result kan hre hman lo - February 11, Inrinni zanah final khelh a ni dawn.

Beisei loh
Ibn Batouta stadium, Morocco-a inkhelah Flamengo coach Vitor Pereira-a'n Al-Hilal a zuam sual a, Atletico Madrid defender hlui Filipe Luis leh Guillermo Varela te chu bench-ah dahin, Uruguay international Varela aia a luhtir Matheuzinho a chesual nghal.

Kum 22 mi defender hian Atletico Madrid forward hlui Vietto ball lalut tur chu a titlu a, penalty a chawi - hei hi Al-Dawsari chuan harsatna nei loin goal-ah a chantir a, rin loh zawkin hma takah hma an hruai.

Flamengo-in minute 15-naah si phurh sutna remchang nei mah se Gerson-a'n tluk a thlang zawk a, referee-in Brazil international hi a tluk der avangin penalty a pe lo a, yellow card zawk a pe!

Gerson bawk!
Flamengo an beidawng lo - minute 20-naah Pedro chuan ṭha zetin si phurh a rawn sut a, mahse, first half hun pek belhah Gerson bawk a chesual nawn.

Marseille midfielder hian hlauhawm takin Vietto chu penalty box-ah a rap. Referee-in video assistant referee a rawn hnuah penalty spot a kawk a, Gerson a hnawt chhuak bawk.

World Cup 2022-a Saudi Arabia tana Argentina laka goal mawi khungtu Al-Dawsari bawk a lo pen chhuak a, chiang taka goalkeeper Aderbar Santos bumin, an goal hnihna a khung.

Goal khat ve ve
Player tam zawka khel Al-Hilal an inringtawk sawt a, minute 70-naah an goal thumna a khung belh ta nge nge - penalty vawi hnih hlawh chhuaktu Vietto chuan goal khung ve a phu tih pholangin, an goal thumna a khung a, 3-1 a ni.

Mahse, Flamengo hian hahdam tak erawhin Al-Hilal hi an chaktir bik lo. World Cup 2022-a Brazil tana feh chhuak Pedro bawk inlar lehin, hun pek belhah si phurh a rawn sut ṭhen - mahse, goal dang khung belh nan erawh a tlai hret tawh a, 3-2 in Al-Hilal an chak.

Flamengo manager Vitor Pereira erawh a lawm lo a, FC Porto coach hlui chuan, "Al-Hilal hmachhawn turin kan inpeih a, mahse, khatiang refereeing chhe lutuk hmachhawn tur erawhin kan inpeih lo a ni," a ti a, a lungawi lo hle.

Lawm lohna
Pereira chuan sawi zawmin, "Thutlukna dik lo a siam reng ringawt mai a ni. First half-a Al-Hilal-in goal shot an neih chu penalty kha a ni mai. Player 11 leh 11 in khel ta ila, a ṭha zawk kan ni ngei ang," a ti.

Hetihlai hian Al-Hilal coach Ramon Diaz ngaihdan erawh a dang thung. Argentine coach chuan, "Flamengo rin aiin kan ṭha a, rilru leh khelh dan hmang thlenga kan inbuatsaihna khan a barakhaih a ni.

"Flamengo khan 4-3-3 emaw 4-4-1-1 emawa formation thlakin, Vietto kha attacking midfielder anga kan chhawr theih an ring lo," a ti a, khel ṭha em em mai Vietto a fak nghal bawk.