Russia leh Belarus hrek duh an tam

International Olympic Committee (IOC) chuan Paris Olympic neih turah Russia leh Belarus infiammite tan kawng hawnsak an tum, an ram hmingin inlan thei dawn lo mah se 'neutral athlete' ni chunga inlan turin kawng siamsak an tum.

Mahse, kar hmasa khan Latvia, Lithuania, Estonia leh Poland te chuan ram pahnih hi tel ve lo turin an duh tih an sawi, hrek an duh chhan hi Russia leh Ukraine indona vang a ni a, infiamna huangah Russia leh a sangawizawnpui Belarus chu na taka hrek an duh a ni.

Finland, Iceland, Norway, Sweden leh Denmark te chuan tun hnai khan thuchhuah inṭawm an siam a, anni pawh hian Russia leh Belarus chu hrek ngei an la duh, thu tawp siam thei erawh an ni lo thung.

Ukraine chuan Russia leh Belarus an tel a nih chuan Paris Olympic-ah tel ve loh an rilruk tih an lo sawi tawh bawk. Thutlukna siam tur IOC tan ngaihtuahna sen uluk a ngai dawn hle tih a chiang.

Amaherawhchu, IOC hi ram ṭhenkhat duh dan ang ngawta kal chi a ni lem lo. Tun hma pawhin Russia hrekna chu a lo ti chhuak tawh ṭhin, mah se infiammite a ngai pawimawh a, kawng hawnsak dan a ngaihtuah hram ṭhin.