Hliam vanga chawl tur Lloris

Tottenham Hotspur goalkeeper leh captain Hugo Lloris chu khup hliam avangin kar ruk aṭanga kar riat tal a chawlh a ngai dawn a, kum 36 mi a nih ve tawh avangin a hliam hian eng ang takin nge a career a nghawng chhunzawm ang tih hriatthiam a harsa.

World Cup 2022 zawh hnua international football chawlhsantu hi Spurs-in 1-0 a Manchester City an hneh ṭum khan a inhliam a, a tlem berah kar ruk tal chawlh a mamawh tur thu hi puan a ni ta a ni.

Spurs hian Southamp-ton leh England international hlui ni bawk Fraser Forster chu second choice keeper an neih lai a ni a, kum 34 mi keeper hian tawnhriat a neih ṭhat tawk tawh avangin harsatna a awm lo tura ngaih a ni - season hmasa ṭan dawn khan Spurs hi a zawm a, match khat chiah a la khelhsak thung.

London club hian Academy player pahnih Brandon Austin leh Alfie Whiteman chu goalkeeper dang an neih an ni bawk a, anni erawh senior team tana tawnhriat ropui sawi tur nei lem lo an ni.

Spurs hi Premier League table-ah pangana an ni mek a, palina Newcastle United chu match khata khel tam chungin, point khatin an phak lo mek.

London club hian February 11, Inrinni zanah league match khel turin Leicester City an lenchilh dawn a, February 14 zanah Champions League last 16, first leg khel turin AC Milan an lenchilh zui ang.

Milan nen an inkhelh zawhah West Ham (Feb 19) leh Chelsea (Feb 26) chu tun thla chhungin an tum dawn a, March thlatirah Sheffield United (March 1, FA Cup 5th round), Wolverhampton Wanderers (March 4), AC Milan (March 8) leh Nottingham Forest (March 11) an hmachhawn bawk ang.