Salernitana mualah Juve an chak

Point 15 paihsak an nih avangin Juventus chu Serie A table-ah an tlahniam viau a, an dinhmun siamṭhat leh tumin theihtawp an chhuah mek. Old Lady hian Thawhlehni zan khan Salernitana chu 3-0 in an hneh.

Turin club tan striker Dusan Vlahovic chuan goal hnih a khung bakah Filip Kostic tan a siamsak bawk a, an chak theih nan a thawh hlawk hle. Serbian star hi hliam vangin tun hnaiah a inkhel tam lo; October thla hnua league inkhela bul a ṭan lehna hmasaah a che ṭha hle.

Juve hian minte 26-naah penalty an hmu. Hans Nicolussi chuan Manuel Locatelli ti tluin penalty a chawi a, a pet tura rawn ding chhuak Vlahovic tan harsatna a awm lo, chawlhlawk hma chiahin an goal hnihna a sual chhuak bawk.

Second half ṭan aṭanga second 80 hnu lekah Juve lamin Vlahovic hmang bawkin an goal thumna an khung. Salernitana keeper Guillermo Ochoa-a'n hna a ngah a, khel ṭha pangngai viau mah se a veng seng ngang bik lo.

Juve manager Massimiliano Allegri chuan, "Dusan Vlahovic hi tun hma zawng aiin a taksa pawh a ṭha zawk tih a hmuh theih, a rilru phut hmang pawh hliam a neih hma nen khan a ṭhat dan a la inang reng bawkin ka hria.

"Ka naute khan an khel ṭha em em a, a bik takin a tir lam minute 60 chhung khan inkhel kan thununin kan mamawh zat goal pawh kan khung thei," a ti. Goal thum an khung bakah Angel di Maria-a'n bar a tihper a, Moise Kean chuan goal ban a tih per bawk.

Juve hian season bul an ṭan fuh lo a, chumi hnuah nasa takin an insiamṭha - pahnihna dinhmun pawh an hauh hman hial. Mahse, an pawisa hman dan leh an lakluh a inrem tawk lo a, dan kalha thil an tih chu chhui chhuah niin an hrem.

Season kal laia point an hmuhsa aṭangin point 15 an paihsak a, tunah hian 10-naah an la awm phak. Champions League khel phal chuna awm Lazio an phak lohna chu point 13 a ni a, beiseina sang lo mah se UCL khel turin kawng a la inhawng.