Kerala Blasters tan playoff a hnai

Thawhlehni zan khan Indian Super League inkhelah Kerala Blasters chuan 2-1 in Chennaiyin an hneh a, playoff khel turin kawng dik an zawh zel.

Kerala club hian Inrinni zanah Bengaluru an hmachhawn leh dawn a, an chak chuan match hnih khelh tur la nei chungin playoff an inpetkai dawn - Chennaiyin tan erawh playoff khel turin thilmak a thlen a ngai tawh thung.

Blasters khelmualah Chenna-iyin tan Abdenasser El Khayati chuan tun season-a ISL goal rang ber a khung a, minute hnihna leka a goal khung hi Dutch forward tan tun season league-a goal kua a khungna chiah a ni - match 10 aṭangin assist vawi li a nei tawh bawk.

Mahse, mualneitu Blasters an beidawng duh lo - Adrian Luna leh Rahul KP hmangin goal an khung leh a, hun tawp thlenga goal dang lut loin 2-1 in an chak daih.

Zanin dar 7:30-ah ISL inkhel pakhat a awm leh dawn a, tun season-a league match 17 khel tawh Ricky Lallawmawma, Laldinliana Renthlei (15) leh Laldinpuia Pachuau (8) te awmna Jamshedpur FC leh ATK Mohun Bagan an inkhel ang.

Bagan hian midfielder Lalrinliana Hnamte (8 matches) leh K. Lalṭhathanga an kawl a, Puitea hian Blasters aṭangin Bagan hi thlasik transfer-ah a zawm - Kolkata club tan match thum a khel tawh.