Osimhen kan zuar lo - Napoli president

Napoli president Aurelio de Laurentiis chuan an striker Victor Osimhen an zawrh loh thu a sawi. Nigerian striker Osimhen hian tun season Serie A match 17 aṭangin goal 16 a khung a, assist vawi thum a nei bawk.

Gli Azzurri president De Laurentiis chuan, "Osimhen kan zuar lo. Kan player-te hi duhtu an tam. Kan club-in ba a neih loh avangin kan player-te hi hralhna chhan tur kan nei lo," tiin a sawi.

Napoli hian league match 21 aṭangin point 56 an hmu a, khelh zat inangah an hnuai chiaha awm Inter Milan aiin point 13-in an hmu sang zawk. Manager Luciano Spalletti hote hian kum 1990 hnua a vawi khat nan league nomawi chawi theihna hun ṭha an nei a, tuna a lan dan chuan an champion ngei pawh a rinawm ta hle.