South American ramten World Cup thlen an dil

Argentina, Chile, Paraguay leh Uruguay te chuan a huhoin 2030 World Cup thlen an dil a, football inelna lian leh ropui ber hian kum 100 a tlin hun a ni dawn a, hemi denchhen hian thlen an dil a ni.

World Cup thleng hmasa ber chu Uruguay an ni, chuvangin South American ramte hian, "Football pianna hmunah a kum 100-na lawm ang," tiin, a pianna ramah ngei mellung pawimawh bik chu phun leh ni se an duh.

Spain leh Portugal te pawhin 2030 World Cup hi a inṭawma thlen an dil dawn a, a lan dan chuan Morocco leh Saudi Arabia te pawhin a inṭawm bawka thlen dil an tum ve bawk niin an sawi.

South American Football Confederation (Conmebol) president Alejandro Dominguez chuan, "2030 World Cup hi chu kum danga World Cup neih nen a inang thei lo, a kum 100-na a nih avangin a danglam.

"FIFA pawhin kan hma lama mi huai kal tate sulhnu kha an hriat reng kan beisei a, World Cup hmasa ber ropuina pawh kha an hriat ngei kan beisei," tiin football lama thuneitu sang ber chu a kar na nghal hle.

World champion vawi hnih lo ni tawh Uruguay hian 1930 khan an khawpui Montevideo-ah World Cup hi an thleng. Argentina hian 1978 khan an lo thleng tawh bawk a, tuna an dilpui zinga mi Chile pawhin 1962 khan an lo thleng tawh bawk.

Argentine Football Association (AFA) president Claudio Tapia chuan, "World Cup thlen hi South American mipuite duhthusam leh suangtuahna a ni. Centenary a nih chu a chhan pakhat a ni, hei bakah hian football hi kan nun a nih vang a ni," a ti.

Football ngainatna khawmualpui an ni a, football a nih tawh chuan sorkar thuneitu lam pawh an ṭawng a ngai ṭhin. Argentina President Alberto Fernandez chuan, "Ram hming tarlan pali chauh kan ni lo, keini bakah hian Bolivia pawhin min thlawp hle," tiin a sawi ve bawk.

Argentina hian Lionel Messi hoin Qatar World Cup nomawi an chawi a, a vawi thum nan world champion an ni. World Cup 2026 chu United States, Canada leh Mexico ten an thleng dawn tih a chiang tawh.