FA Cup Kompany hoten last 16 an lut

FA Cup fourth round replay-ah Championship hmahruaitu Burnley chuan Ipswich Town chu Nathan Tella goal hnih hmangin 2-1 in an hneh a, last 16-ah Fleetwood Town an hmachhawn ang.

Fleetwood hi League One club an ni a, 17-naah an awm mek. Fishermen pawh hian fourth replay an khel ve tho a, last 16 lut turin League One hmanruaitu Sheffield Wednesday an hneh.

Burnley hi season liam ta khan Premier League aṭangin an relegate a, manager atan Pep Guardiola hnuaia inchher hriam Vicent Kompany an lalut.

Kompany hnuaiah hian season bul an ṭan ṭha lo a, match hmasa 12 aṭangin vawi li chauh an chak. Amaherawhchu Clarets an insiamrem chho zel a, match hnuhnung 14-ah vawi 13 an chak ta thung.

Burnley tan Championship-a champion chunga Premier League-a inpetling chu an tum ber a ni a, league-ah hian point sariha hma an hruai tawh bakah pathumna Middlesbrough aia point 17 zeta an san avangin FA Cup-a rilru pe thei dinhmunah an ding.

Turf Moor-ah Tella hian minute hnihna lekah goal khung mah se Ipswich Town-in George Hirst hmangin an sut. Clarets-in inkhel thunun mah se goal an khung thei lawk lo a, injury time minute linaah Tella-a'n chakna goal a khung.

Clarets manager Vicent Kompany chuan, "Second half-a kan khelh danah ka lawm a, first half erawh rin lawk angin kan muang hret. Team anga kan thawhhona ṭhat zarah round sang zawk kan thleng a ni," tiin a sawi.