Futsal C'ship-ah Electric Veng an chak nghal

Nimin khan Hero Futsal Club Championship-ah Mizoram aiawha tel Electric Veng Futsal Club an inlan ṭan a, match hmasa berah Ladakh club Dzawo 11 FC chu 10-2 in an sawp.

KD Jadhav Hall, Delhi-ah Dzawao-in goal khung hmasa mah se Mizo club-in goal 10 zetin an vaw let. Electric Veng tan Lalsangkima'n hattrick a siam a, Lalrin-sanga Khawlhring leh Lalhlimpuia (Tat-a) ten goal hnih khungin Lalrosanga, VL Rindika leh Dylan Zodinsanga ten goal khat ṭheuh an khung bawk.

Mizo club hi vawiin zing dar 9:30 hian Sports Odisha nen an inkhel leh ang.

AIFF buatsaih futsal club inelnaah hian MFA chuan MFA Futsal League champion team a tir a, an inkhel hi AIFF YouTube channel-ah a en theih.