Tualchhung basketball inelna lian ber MSL season 8 a lo her chhuak leh ta

10th February, 2023

Mizoram Super League bul an ṭanna kha rei lo te ni maiin a lang, mahse kuminah chuan season 8-na a lo ni der mai. Vawiin tlai aṭangin tualchhung basketball inelna lian leh sang ber hi an khel ṭan leh tawh dawn.

Tournament hi R. Deng-ṭhuama Indoor Stadium, Mualpuiah vek khelh a ni dawn. Team thar Bungkawn LB leh Mission Veng Hotshots ten tlai dar 4:00 hian match hmasa ber an khel dawn, inkhel a hmuhnawm nghal a rinawm.

Champion lai Zarkawt BCA leh Chanmari Vikings te zan dar 8:30-ah an intawng zui ang. Inkhel hi Zonet Rihnimah live a en theih a ni dawn, a duh tan a hmunah a en theih dawn bawk, tualchhung basketball ngainatute tan chanchin lawmawm a ni ang.

India tana basketball khel tawh - Mizo rawlthar tam takin basketball an tuichilh chhan zinga mi chu H. Laldinsanga (Mapuia) a ni. Mapuia hming leh Khatla TBL an inzawm tlat a, tun season erawh Zarkawt BCA tan a khel dawn!

MSL hmasa pahnihah Mapuia hian Khatla TBL a champuin pui, nomawi an chawi hmasak ṭum hian Most Valuable Player a ni. MSL MVP hmasa ber Mapuia chuan, "Mizoram Super League hi season 7 kha ka khel lo, a bak chu ka la khel vek.

"Hna thawhna avangin basketball khel turin hun neih tam tawk a harsa, remchang ka nei ve leh hi ka lawm. Taksa invawn nan a pawimawh a, chumi piah lamah chona hmachhawn ka la duh reng," tiin Vanglaini a hrilh.

Saron Veng tlangval hian tawnhriat a nei ṭha tawh a, a vanglai pel deuh tawh mah se a thiam a la theihngilh lo. MSL 8 qualifying-ah khan Champhai tan a khel a, player pawimawh niin Aizawl khaw pawn aṭanga MSL khel thei hmasa ber turin a tlinpui.

Mapuia hian MSL bikah chuan Khatla TBL ni lo jersey dang a hak vawi khatna tur a ni dawn. Lalrina Renthlei, Matthew Remtluanga leh Zonunsanga te nen an awmho avangin an hmuhnawm dawn tih a chiang, a hmuna en a fuh ang.

BCA coach Lalruatfela (Afela) chuan, "Inbuatsaihna chu kan nei ṭha angreng viau, nomawi humhum tumin theih tawp kan chhuah ang," tiin Vanglaini a hrilh. A zawna vawi li champion thei an ni a, an khingpui tur Chanmari Vikings tan fimkhur a ngai dawn.