NE zone tana khel tur Puipuii leh Felfeli

Mizoram Women's Senior Team player pahnih - Lalhriatpuii leh Lalrinfeli te chu BCCI hnuaia tualchhung hmeichhe inelna lian Senior Women's Inter-Zonal One Day Tournament-ah North East Zone tana khel tura thlan an ni.

Pathianni aṭangin Hyderabad-ah team paruk telna tur inelna hi khelh ṭan tur a ni a; Lalhriatpuii, Armed Veng leh Lalrinfeli, Hnahthial te hian Zirtawpni hian an team an zawm ang.

India rama tualchhung inelna a hmeichhe player ṭha thlan khawm inelnaah hian team paruk - North Zone, South Zone, West Zone, East Zone, Central Zone leh North East Zone te an khel dawn.

Anni pahnih bakah hian Mizoram Senior Women's Team aṭangin PC Vansangzuali chu standby-ah dah a ni a. Non-playing staff lamah Joseph Lalhriatpuia chu North East Zone manager a ni bawk ang.

North East Zone hian Pathianni hian NFC Ground-ah East Zone an hmachhawn ang. Thawhṭanniah North Zone hmachhawn lehin Nilaini leh Zirtawpni-ah South Zone leh West Zone an tum ang. February 19, Pathianni hian an inkhel hnuhnung berah Central Zone an hmachhawn dawn a ni.