Manchester City thubuai Eng ang takin nge a nghawng nat dawn?

Premier League chuan Thawhṭanni zan khan Manchester City chu sum hman dan chungchanga an dan zam sa bawhchhiaah an puh a, thubuai an siamsak.

English top flight league-ina an ram champion lai chunga thubuai an siam hian ngaihven a hlawh nghal a, eng ang takin nge dan an bawhchhiat a, eng ang taka hremna na nge an hmachhawn dawn, tih chu football fans tam takin zawhna an nei mek.

Kum 2008-a Abu Dhabi United Group-in City an lei hnu khan player lakluh nan sum tam tak an seng a, Premier League nomawi ringawt pawh vawi ruk an chawi - mahse, hengte hi engmah lo maia chang thei dinhmunah a ding mek.

Thubuai chu

Premier League chuan City hi kum li chhung zet a zirchiang a, Abu Dhabi United Group-in kum 2008-a an lei club hian 2009-2018 inkar khan Premier League financial rules 100 chuang an bawhchhia niin an sawi.

Football finance expert Kieran Maguire chuan, "City hi dik lo taka an sum lakluh dan tarlangah puh an ni a, an sum hmuh ṭhenkhat, sponsorship anga an tarlan chu club neitute aṭanga an hmuhah puh an ni.

"Club neitu aṭanga sum hmuh hrim hrim hi FFP (financial fair play) dan bawhchhiatna a ni lo a, mahse, sponsorship anga tarlan erawh FFP dan bawhchhiatna a ni. Club neitute company danga hnathawk angin manager ṭhenkhat chu lantir an ni a, hei hian club sum senso chu a tlem zawkin a lantir bawk," a ti.

A bul ṭanna

November 2018 khan German chanchinbu Der Spiegel chuan document leak pholangin, City chuan sum leh pai an hman dan chungchangah UEFA an bum niin an tarlang a, FFP dan an bawhchhiat chu an zep ru, niin an sawi.

European football-a thuneitu sang ber UEFA chuan he puhna hi chhui nghalin, 2020 khan an chhuichiannaa an thil hmuh chu puangin, 2012 -2016 inkar khan City chuan FFP dan an bawhchhia niin an sawi - kum hnih chu European football inelnaa inlan thei lo tura hrem an ni.

Mahse, infiamna khawvela thuneitu sang ber Court of Arbitration for Sport (CAS) chuan City hi thiam chantirin, hrem an ni lo a, tuna Premier League thubuai siamsak pawh a dik loh thu City chuan an sawi.

Engati nge tunah?

UK sorkar chuan English football-a him zel theih nan ruahmanna an siam a, an ruahmanna zingah zalen taka football kalphung lo en a, lo vil tur din a tel - he an ruahmanna hi tun thla chhunga tlangzarh hman tura ruahmanna siam a ni.

Hetiang boruak a awm lai taka Premier League-in City thubuai an siamsak thu an ti chhuak hi tam tak chuan a chhan a awmah an ngai. Maguire chuan, "PL tan chuan thutlukna huaisen thlak siam turin theihna an nei, tih lantir hun a ni ve a ni," a ti.

BBC sports editor Dan Roan chuan, "City thuneitu ṭhenkhatin, thubuai an neih hun leh sorkar ruahmanna awm chhoh hun innang an ringhlel hi a awm viau a ni," a ti ve bawk.

Buaina ral lian

Roan chuan, "Premier League chanchina sum lam buaina lian ber a la ni rih - eng club mahin hetiang em ema thubuai tam hi an la nei ngai lo," a ti. Roan chuan sawi zawmin, "Thubuai siamsak hi a lo dik ngei a nih chuan club tan hian a pawi dawn lutuk.

"Club neitu Abu Dhabi lam tan a pawi ang a, sorkar inrawlhna pawlin club an neih hi a dik tawk leh tawk loh zawhna a awm leh bawk ang. City hian Pep Guardiola an chân ngei bawk ang," a ti.

Spanish manager hian club thuneitute thu hrilh chu a pawm mai thu leh, dawt an lo sawi a nih chuan a ban tur thu nikum khan a lo sawi daih tawh. Roan chuan, "He thubuai hi a kal rei viau thei a, Premier League tan chuan a ṭha lo khawp ang," a ti bawk.

Eng nge an sawi?

City chuan, a chiang leh fiah thei ang bera Premier League hnena engkim an thehlut chung a, thubuai siamsak an ni chu mak an tih thu an sawi - Maguire chuan City-in thubuai an neih theih nana hmanhlel club an awm niin a lo sawi ve bawk!

Hetihlai hian City chu thubuai siamsak an nih chungchangah an inringtawk hle nia sawi a ni a, Manchester khaw club hian hremna pumpelh theih an inring niin an sawi.

City chuan, "Independent commission-in thlei bik nei hauh loa an zirchian turin kan dikna, hnial rual loah kan ding nghet tlat a ni," an ti a, an buaina chu chinfel thuai a nih an beisei thu an sawi bawk.

Engtin zel?

Premier League chuan City hi a chhui chiang tur bika ruat independent commission ngaihtuah turin an dah a, infiamna dan lam hre mi Murray Rosen KC-a kaihhruai commission hian private-in he thubuai hi an ngaihtuah ang.

Commission-in thutlukna an siam hnuah City hi an lungawi lo a nih chuan, Premier League huang chhungah chuan an la zualko leh thei dawn a, beisei tih san viau erawh a harsain a rinawm.

Infiamna lam dan hremi Ashley Cukier chuan, "European level-a ngaihtuahna sen ngaihna ang chi a nih loh avangin Court of Arbitration for Sport (CAS) ah a kal theih lo a, Premier League chhungkaw thil chu hetah ngei chinfel a ni ang," a ti.

Hrem ta se...

City hi an thubuaiah hian thiam loh chang ta se, sum chawitir, point paihsak leh Premier League aṭanga paihthlak thlengin hrem theih an ni - Commission kutah engkim a innghat.

Maguire chuan, "Hremna hi eng pawh a ni thei a, tiam chin a awm lo - an duh chuan, "Ti tawh suh u," tia warning pein an thlah thei a, point paihsak, nomawi chhuhsak leh Premier League aṭanga paihthlak thlengin hrem theih an ni bawk," a ti!

A tawi zawnga sawi chuan City hmabak a êng lo a, an chunga hremna thleng thei hisap phei chuan club thuneitute tan tui taka mut a har khawp ang - thubuai ngaihtuahtu tur hotupa ber Murray Rosen KC hi Arsenal fan a ni.

Thawnthu hlui

British football-ah FFP dan bawhchhia hrem an lo awm nual tawh. Kum 2011 khan Queen Park Rangers chu transfer dan an bawhchhiat avangin hrem an ni a, £875,000 chawitir an ni.

Leicester City leh Bournemouth te chu 2013-14 leh 2014-15 a Premier League an inpetkai khan FFP dan an bawhchhiat avangin sum chawitir an lo ni tawh a, kum 2012-a Rangers an tlakchhiat khan Scottish FA leh Scottish Premier League-a an registration tihtawpsak niin, division mawngphah aṭangin bul an ṭan ṭha tawh.

Serie A club ṭha Juventus chu thla hmasa khan transfer lama an chet dan avangin point 15 paihsak an ni. Cukier chuan, "Commission hian an duh ang hremna an pe thei a, eng ang taka hremna na nge pek an phu ber, tih chu commission ngaihtuah tur ber a ni," a ti - City fans an hlauthawng a, kan dem mawlh lo!