Messi leh Neymar awmna PSG an tla

Lionel Messi leh Neymar awmna Paris St-Germain chu French Cup last 16 paltlang zo loin an tla. Nilaini zan inkhelah PSG hian Marseille chu 2-1 in an ngam lo a, vawi 14 an champion tawhnaah hian a kum zawnin nomawi an chawi dawn ta lo a ni.

Marseille tan Arsenal forward hlui Alexis Sanchez chuan penalty aṭangin goal hmahruai a khung. Chawlhlawk hma chiahin Sergio Ramos chuan Neymar siamsak hmangin si phurh a sut a, second half-ah mualneitu lamin midfielder Ruslan Malinovskyi hmangin chakna goal an khung.

Ligue 1 champion lai leh hmahruai mektu PSG hian hliam vangin Kylian Mbappe an chhawr thei lo. Marseille lakah hian ball chang tam leh inkhel thunun zawk an ni, mahse a hlauhawm chinah an che fuh hleithei tlat lo chu an tuar.

Barcelona captain hlui Messi-a'n professional tournament a khelh chinah, a club hlui Barca leh an ram Argentina tan chuan tournament a khelh zawng zawngah a champion vek tawh - French Cup chauh hi a la champion lohna awm chhun a ni hial.

Marseille tan hian Sanchez bakah hian Arsenal plyer hlui dang - defender Sead Kolasinac leh midfielder Matteo Guendouzi te pawh an inlan a, player pawimawh leh innghahna an ni phak.

PSG leh Marseille hian February 26 hian league match an khel dun leh nghal ang, pahnihna Marseille leh hmahruaitu PSG inkarah hian point riat a awm mek - Ligue 1 nomawi pawh inchuh zui thei reng an la ni.