Rajasthan lakah Aizawl FC an 'comeback'

Thlasik transfer-ah Aizawl FC-in player pakhat chiah an lalut a, a hming chu Ivan Veras a ni. Mizo club-in player pakhat chiah lalut mah se, sum an hmang thlawn lo tih a lang nghal a, Belurasian striker hian I League-a a match hmasa berah chakna goal a khung nghal.

Rajiv Gandhi Stadium, Aizawla inkhelah mikhual team Rajasthan United lamin goal an khung hmasa zawk a, Aidar Mambetaliev chuan minute 17-na lekah goal hmahruai a khung.

Khualmuala Rajasthan lo ngam tawh lotu Aizawl FC hi an tlawm nawn dawn niin a lang hman. Mahse, Mizo club mualpho tur ngaingam loin, R. Ramdinthara chuan minute 71-naah si phurh a sut a, hun pek belh minute ruknaah Veras chuan chakna goal a khung bawk.

Barakhaih!

Aizawl FC-in khualmualah Rajasthan hi 1-0 in an lo ngam lo tawh a, coach Caetano Pinho-a'n a player chhawr rimte bawk a hmang. Mizo pakuain bul an ṭan a, Henry Kisseka chu hmatawngah awmin Akito Saito chu defence laiah a awm. Player thar Veras pawh rinlawk ang ngeiin bench-ah a awm bawk.

Mualpuiah Rajasthan an inthlahrung lo - he team hian Lunglei tlangval Lalliansanga Renthlei chu captain armband an hrentir a, Aizawl FC striker hlui F. Lalremsanga an nei bawk.

Mikhual tlangnel team hian minute 17-na lekah goal hmahruai an khung a, Kyrgyz defender Aidar Mambetaliev chuan mualneitu team barakhaihin, goal hmahruai a khung - first half-ah Mizo club an ngam hle.

A hming Veras

Goal dang lut loin chawlhlawk hman a ni a, Mizo club ṭantute an hlauthawng. Mahse, Tharpuia'n goal khung a thiam tih pholangin, minute 71-naah an si phurh sutna goal a khung a, 1-1 a ni.

AFC-in chak tumin Veras bakah attacking player K. Lalrosanga leh HK Lalhruaitluanga-te an luhtir a, chak ngei an tum tih a lang. A tawpah Mizo club-in an huaisen rah an seng a, injury time minute ruknaah Veras-a'n goal a khung a, AFC tana a match hmasa berah point thum a hlawhchhuahpui.

Mizo club-in tun season I League-a a vawi khat nan a zawnin hnehna an chang a, table-ah panganaah an chho. Palina Churchill Brothers aia match khata khel tlemin, an point hmuh zat a inang.