Real-in Club World Cup final an lut

FIFA Club World Cup final-a inhmachhawn tur a hriat ta - Real Madrid chuan Nilaini zan khan Al Ahly chu 4-1 in an sawp a, final-ah Flamengo hnehtu Al-Hilal nen an intawng ang.

Real hian hliam vangin striker chhuanvawr Karim Benzema leh goalkeeper Thibaut Courtois chhawr thei lo mah se chak turin harsatna an tawk lo a, an phu ang ngeiin final an lut.

Spanish champion tan hian Vinicius Jr, Federico Valverde, Rodrygo leh Sergio Arribas ten goal khat ṭheuh an khung a, Ali Maaloul-a penalty chhuih luhin African champion tan awmzia a nei phak lo.

A harsa

Al Ahly coach Marcel Koller-a'n Real lakah hnehna chan tumin 4-4-1-1 formation a rawn hmang a, a duh ang ngeiin hun engemaw chen chu Real an dang chat thei - mahse, team ṭha zawk leh hriam zawk hi dan chah reng theih an ni lo.

Egyptian club Al Ahly player Aliou Dieng chuan chhe zetin Mahmoud Metwaly chu ball a pe a, pressure petu Vinicius-a'n ball chuhsakin, minute 42-naah inkhela goal hmasa ber a khung.

Real an hawikir tawh lo - second half ṭantirah Al Ahly keeper Mohammed El Shenawy chuan Rodrygo-a shot a dang per a, a per lehlam chu Valverde-a'n goal ruakah a khung a, 2-0 a ni der.

A hmawr bawkna

Real-in beisei an phak lo zui - Vinicius chuan uiawm takin chance vawi hnih a hlah a, Eduardo Camavinga-a'n Hussein El Shahat a tihtluk avanga penalty a chawi chu Tunisia international Ali Maaloul chuan goal-ah a chantir.

Madrid tan awlsam taka chak theih ni mah se Luka Modric chuan penalty a chhuih lut ve lo a, El Shenawy chuan a dansak - mahse, hei hi Real tawpna erawh a ni lo.

Hun pek belhah Rodrygo leh bench aṭanga luhtir Sergio Arribas ten goal khat ve ve an khung ve leh a, Real-in 4-1 a hnehna changin final an lut.

Thukhawchang

Real boss Carlo Ancelotti chuan, "2-0 a nih khan game a tawp tawh emaw kan ti a, mahse, chu chu football kalphung a ni lo. Kha aia ṭha zawka ti tur kha kan ni - kan khelh dan kan thlak a, game kan thunun thei ta lo.

"Kan chak emaw kan ti a, mahse, khatiang tur a ni lo. Khelh ṭhat reng a, a tawp thlenga theihtawp chhuah a ngai a ni," a ti a, a naute inthlahdah hma lutuk chu a lawm loh thu a sawi.

Al Ahly coach Marcel Koller chuan, "Real Madrid lakah ṭha taka khel chungin, kan chance neih kan chhawr lo a, chu chuan min tilawm lo a ni," a ti a, an hun neih an chhawr lo chu pawi a tih thu a sawi.