Man United-in point khat hmu hram

Manchester United-in Nilaini zan khan manager nghet nei lo Leeds United an mikhual a, goal hniha an hnu fual hnuah si phurh sut ve vein 2-2 in inkhel a tawp.

A suttu Man United

Old Trafford-ah Leeds United-in minute khatna lekah Wilfried Gnonto hmangin hma an hruai a, mikhual team hi second half-ah pawh bul ṭan ṭha zawk niin minute 47-naah Raphael Varane-a'n an lama a tihluh zarah 2-0 in an hma an hruai.

Man United chak lo thei dinhmunah an ding a, tun hnaia che ṭha Marcus Rasford-a'n minute 62-naah siphurh a sut ṭhen a, minute 70-naah bench aṭanga lut Jadon Sancho-a'n goal pawimawh a khung. Inkhel tawp thlengin boruak a ṭang a, team pahnih an innawr tawn avangin a hmuhnawm a tluan.

Leeds tan a hlu

Leeds United-in Jesse Marsch an ban a, England futsal head coach hlui Michael Skubala hoin an hmelma Man United an hmachhawn. Skubala-a'n a naute a fuih ṭha a, ṭan phat aṭangin an nung ṭha a, goal pawh an khung hma.

Second half-ah Crysencio Summerville cross chu Raphael Varane-a'n dang kawiin David de Gea-a'n a goal lai a en hliam a, minute 48-ah 2-0 a ni der. Goal hnihna luh danah Leeds vannei mah se inkhel pumpui thlirin point hmuh a phu.

Leeds hi point thum hlawh chhuak theiah ding mah se Old Trafford-a point khat an hlawh chhuak pawh hi chanchin lawmawm a ni.

Casemiro tel lohna

Man United-in hrem vangin Casemiro an chhawr thei lo a, midfield laiah Fred leh loan hmanga an lak Marcel Sabitzer te an inkawp.

Brazilian midfielder Fred hian ball a hloh nasa a, pass sual a ngah bawk. Man United-in Casemiro awm lo an tuar tih a lang a, hun tawp lamah phei chuan Ten Hag-a'n Victor Lindelof midfield-a khelhtir a ṭul hial.

Man United tan manager nghet nei lo Leeds nena inhnehtawk hi result ṭha lo mah se goal hnih an chhuah hmasak avangin an tho chhuak ṭha tihin a sawi theih. Substitute aṭanga lut Jadon Sancho a che ṭha a, English winger Sancho hian goal a khung bakah vawi tam Leeds tlarhnung a tihbuai avangin United ṭantute tan lawmna tur a awm ang.

Ten Hag-a hote hian kar tawpah Leeds United bawk an hmachhawn dawn a, an inkhelhna tur hi Elland Road a nih tawh avangin Man United hi point hloh nawn thei dinhmunah an ding.