Kolkata khawpuiah goal ruk an khung

Nilaini zan Indian Super League inkhelah goal ruk ngawt a lut a, East Bengal leh NorthEast United chu 3-3 in an inhnehtawk - Kolkata club tan Cleiton Silva chuan minute 10-na lekah goal hmahruai a khung a, Jerry Lalrinzuala siamsak a ni.

Mahse, Highlander tan Parthib Gogoi leh Jithin MS ten minute 32 chhungin an chhanglet a, mikhual team hian 2-1 in hma an hruai thung - Highlander hmahruai chhung erawh a rei lo.

First half hun pek belhah Jake Jervis chuan East Bengal tan si phurh sutna goal a khung a, minute 64-naah Silva chuan ama penalty hlawhchhuah a khung bawk - kum 36 mi striker hian tun season-ah goal 12 a khung ta.

Mahse, Highlander-in kut ruaka haw an tum bik lo. Hun tawp nan minute nga chiah a awm tawh tihah Imran Khan chuan goal a rawn khung ve leh a, 3-3 in inkhel a tawp.

East Bengal tan Jerry bakah Lalrinzuala chuan inkhel bul a ṭan a, NorthEast United tan defender Joe Zoherliana leh R. Laldanmawia te chu minute 67-naah luhtir an ni bawk.

Zaninah ISL inkhel pakhat a awm dawn a, zan dar 7:30-ah Odisha FC leh Hyderabad FC an inkhel ang - Odisha tan playoff khel turin tlawm a thiang tawh lo.

Odisha hian Mizo player pasarih an kawl mek a, forward Jerry Mawihmingthanga (16 matches), midfielder Isaac Vanmalsawma (16) leh forward Isak Vanlalruatfela (7) ten hmun pawimawh changin, defender Lalruatthara (3), midfielder Paul Ramfangzauva (2), goalkeeper Lalthuammawia Ralte leh forward CVL Remtluanga te an awm bawk.

Hyderabad hian midfielder Lalchungnunga Chhangte (1), midfielder Mark Zothanpuia (1) leh goalkeeper Lalbiakhlua Jongte te chu Mizoram player an kawl an ni.