Kartawpah Premier League final inpuahchahna Arsenal vs Brentford; Man City Vs Villa

Premier League-ah final a awm lo. Chutihrualin February 15, Nilaini zana Arsenal-in Manchester City an mikhual tur hi chu final ang hiala chhal theih a ni a, en a châkawm takzet.

Mikael Arteta hote hian Pep Guardiola hote an hmachhawn hmain Brentford an mikhual phawt dawn. Zanin dar 8:30 hian Emirates Stadium-ah Gunners leh Bees an inkhel ang. Man City pawhin February 12, Pathianni zan dar 10:00-ah Aston Villa an mikhual ang.

Gunners Vs Bees

Arsenal match hnuhnung ber thlirkir chuan Goodison Park-ah Everton an hmachhawn a, 1-0 in an chak lo. Arteta hoten a rang lama insiamṭhat an mamawh a, chutihrualin Gunners vanneihna erawh Tottenham lakah an elpui Man City an tlawm. Hei bakah hian Brentford hi an mual Emirates Stadium-ah an hmachhawn dawn a, nikum September thla khan 3-0 in khualmualah an hneh tawh bawk.

Gunners captain Martin Odegaard chuan, "Mikel Arteta hi manager ṭha chungchuang a ni a, a ṭhat dan hi sawifiah a harsa. A hnathawhah hian a thinlung zawng zawng a pe a, a chang phei chuan a chet dan hi a mak ṭhin. Mahse, a ṭawng tawh chuan a thil sawi ang hi a thleng ṭhin," tiin manager a fak.

Champion chungchang sawi chhunzawmin Odegaard chuan, "Champion thei zingah kan tel a, kalkawng erawh a la thui hle. Tumahin May-a thil thleng tur kan la ngaihtuah lo a, match tinin a tla chawp zelin kan inbuatsaih. Kan team hian theihna sang tak kan nei a, eng nomawi pawh chawi thei kan ni," tiin a inringtawk hle.

Odegaard hi a inringtawk viau nachungin season liam ta khan Gunners hian Champions League khelh theihna hun ṭha an neih hnuah an che sual a, Europa League an khel ta zawk. Tun season-ah pawh fiahna tak tak a inṭan chho a, an nihna tak a lang chho zel dawn.

Gunners khingpui tur Bees hian an match hnuhnung berah Southampton 3-0 in an sawp thei a, match kuaah chak loh an neih loh avangin table-ah pawh pasarihnaah an awm. Thomas Frank-a hote hi match hnuhnung pasarihah vawi nga an chak a, an hneh zingah Man City leh Liverpool an tel!

Buaina kara leng City

Man City-in an match hnuhnung berah Tottenham an hneh lo a, an player lak theih loh Harry Kane an ngam lo. Spurs lakah hian goal khung khawl Erling Haaland-a'n goal zawnah vawi khat pawh a pet lo a, Pep Guardiola hoten beisei an pha lo hle.

Premier League champion lai hian Spurs an hneh loh bakah Arab sum mawm an chawm hnua an sum chevel dik loh avangin hrem theih dinhmunah an ding mek. City hi point paihsak theih an nih bakah Premier League aṭanga paih theih hial an ni a, an hmabak a thim hle.

Chutihrualin Pep-a hoten hian khelmual pawna an buaina sut kian nan khelmual chhunga chet ṭhat an mamawh a, Aston Villa lakah point thum an hlawhchhuah ngei a ṭul dawn. Season liam ta khan Man City-in match hnuhnung berah Villa an hmachhawn a, 2-0 a an hnufual avangin nomawi chawi lo thei dinhmunah ding mah se 3-2 in an hneh let.

Mahse Aston Villa hian Man City hi nikum September thla khan Villa Park-ah 1-1 in an chelh. An inkhelhna hnuhnung pahnih thlirkir chuan Man City tan point thum a chiang lo a, hnehna an chan theih nan Haaland-a'n a goal khung theihna 'boot' ngei a rawn bun a ṭul ang.