MSL a hmuhnawm nghal

Mizoram chhunga basketball inelna sang ber Mizoram Super League Season 8 chu nimin khan R. Dengṭhuama Hall-ah khelh ṭan a ni a, match hmasa berah Mission Veng Hotshots chuan LB Associates Bungkawn chu 91-61 in an sawp.

Mission Veng hian MSL kaithar Bungkawn chungah zahngaihna an lantir lo a, LB Associates tan inzirna tur ṭha tak a ni ang.

Zanin hian inkhel hmuhnawm en tur a awm chhunzawm dawn. MSL club hlun zinga mi Tuikual South chuan club thar Khatla South Barons an hmachhawn dawn. Khatla South hi Mizo hlanga khel tur an ni a, H. Lalhmachhuana leh Lalropuia te chu rinrawl tur niin tawnhriat nei ṭha PB Vanlalmuana leh Gospel Lalthawmmawia ten an ho ang.

MSL hmasa pahnih champion Khatla TBL-in club thar Champhai an hmachhawn dawn. Champhaiin TKS tana khel tawh point guard Eddie Zothanpuia an kawl a, foreigner Agu Standley Chiedozie an nei bawk. Mahse, MSL-ah chuan TBL chu TBL an ni leh ṭhin. Mizo player ṭha Vanlalṭhazuala, Michael Liansanga leh Vanlalrinchhana te thlawp turin foreigner Johsua Aaron Keys an kawl.

MSL8-ah hian club pariat Champhai, Chanmari Vikings, Khatla South Barons, Khatla TBL, LB Associates Bungkawn, Mission Veng Hotshots, Tuikual South BC leh Zarkawt BCA te an tel a ni.