Club World Cup final; Al-Hilal lakah theihtawp kan chhuah ang - Ancelotti

Real Madrid coach Carlo Ancelotti chuan Club World Cup final-a an hmachhawn tur Al-Hilal chu en liam mai a tum loh thu a sawi a, Asian champion chu nau en ngawt a fuh loh tur thu a sawi.

Ancelotti chuan, "Semi-final-a chak an phu avanga final lut team kan tum dawn a, he team hi kan dah nau tur a ni lo ang. Player ṭha tak tak an nei a, an thawhhona a ṭha hle bawk. Final khelh an châk em em ang tih ka ring a, keni pawh chutiang chiah chuan kan phur a ni," a ti.

Real Madrid hian zanin dar 12:30-ah Al-Hilal nen Club World Cup final an khel dawn a, Saudi club Al-Hilal hian semifinal-ah South American champion Flamengo chu an pet chhuak a ni.

Ancelotti chuan, "Final atan hian kan inpuahchah ṭhat a ṭul hle. Player-te hnenah an tih tur tak hrilh a, game plan ṭha tak siam a ngai - hetiang ang game boruak sanga khelh thiam player chu kan nei nual a ni," a ti a, fimkhur a ṭul thu a sawi rualin, an ṭhat tawk thu a sawi tel.

European champion hian semifinal-ah striker chhuanvawr Karim Benzema leh goalkeeper Thibaut Courtois te an chhawr thei lo a, final-ah erawh Benzema bik chu chhawr theihin a awm dawn - 100% erawh a nih a rinawm lo.

Ancelotti chuan, "Benzema leh defender Eder Militao te 100% in an la dam lo. Karim hi chu a zia viau a, Militao erawh a inlan ka ring lo. Engpawh ni se, club training an zawm ve phawt ang a, thutlukna chu kan siam ang.

"Dani Carvajal pawh a dam tawh a, Marco Asensio pawh a hliam tenau a dam tawh e," a ti a, semifinal ai chuan an ṭha zawk dawn tih a chiang.

River Plate boss hlui Ramón Díaz enkawl Al-Hilal tan Flamengo laka penalty vawi hnih hlawh chhuak a, goal khat khungtu, Atlético Madrid forward hlui Luciano Vietto a pawimawh leh ang.

Tlarhmaah Manchester United striker hlui Odion Ighalo chu mal tlatin, a hnung chiahah Vietto, Porto forward hlui Moussa Marega leh Saudi Arabia chhuanvawr Salem Al-Dawsari ten an thlawp thei dawn.

Midfield-ah Colombia international Gustavo Cuéllar leh Benfica midfielder hlui André Carrillo inkawpin, tlarhnung lam hi South Korea international Jang Hyun-soo-a'n a ho ang a, awlsam taka Real chaktir an tum dawn bik lo.