Electric Veng an êng zel

Hero Futsal Club Championship-ah Mizoram aiawha tel Electric Veng Futsal Club chuan match hmasa bera Ladakh club Dzawo 11 FC 10-2 a an sawp hnuin nimin chawhma khan Sports Odisha chu 5-2 in an hneh.

KD Jadhav Hall, Delhi-ah Electric Vengin coach leh player ni kawp Lalhlimpuia (Tat-a) hmangin minute kuanaah hma an hruai a, minute hnuah SK Raheman hmangin Odisha-in siphurh sut mah se Mizo team chungnunna a lang zui.

Electric Veng tan Lalsangkima, Zomuanpuia leh VL Rindika ten goal khat ṭheuh an khung hnuah Tat-a'n goal khat dang a rawn khung belh. Odisha tan Jagannath Tudu-a'n goal khat a rawn khung belh a, Electric Veng 5-2 in an chak.

Mizo club hian vawiin chawhnu dar 2:30 hian Techtro Swades United FC an hmachhawn leh dawn a, inkhel hi Indian Football 'YouTube' channel-ah a en theih.

Mizoram Futsal League champion Electric Veng FC hi match hnihah vawi hnih chakin group A hmahruaitu an ni a, chutihrualin champion lai Delhi FC-in vawi khat chauh la khelin Bengaluru 11-5 in an hneh. Mizo player pasarih ngawt awmna Delhi hian vawiin chawhma dar 9:30 hian Sports Odisha an hmachhawn ve leh ang.