Zorammuana'n India ai a awh dawn

Mizo boxer ṭha Zorammuana chuan 74th International Boxing Tournament STRANDJA 2023 a khel dawn a, Tuipui boxer hi India aiawhin flyweight (51kg) ah a inlan dawn a ni.

Zorammuana hian tunah hian National Camp, Patiala-ah training ngawrh takin a nei mek a, inelna hi February 18 - 27 inkar hian Sofia, Bulgaria-ah neih tur a ni a, February 16-ah Zorammuana hian Bulgaria a pan ang.

Inelna hi Bulgarian Boxing Federation-in a thlen leh huaihawt tur niin, International Boxing Association (IBA) leh European Boxing Confederation hriatpuinain inelna hi neih tur a ni.

Tuipui boxer Zorammuana hian North East Olympics 2023 neih zawh takah khan Mizoram tan gold medal a hlawh chhuak a, January khan National Boxing Championships-ah inlanin, final a thleng.

Mizoram aiawh boxer zinga final lut awmchhun niin, silver medal a la a, 'Best Challenger'-ah thlan a ni - he inelna aṭang hian India camp-a awm tura koh a ni a, February a her chhuah meuh chuan India tan a feh chhuak dawn ta.