Ronaldo-a'n league goal 500 a khung!

11th February, 2023

Cristiano Ronaldo chuan Ningani zan khan Al Nassr tan goal li a khung a, Saudi Pro League-ah Al Wehda 4-0 in an sawp. Portuguese forward Ronaldo hian league-ah goal 500 a khung tling a, club panga tan league pangaa a goal khung zat belhkhawm chu goal 503 a ni.

Ballon d'Or vawi nga dawng tawh Ronaldo hian thlasik bazarah Saudi club Al Nassr hi a zawm a, khawthlang media-te tarlan danin kum khatah pound maktaduai 177 a hlawh pha. Amaherawhchu kum 38 mi Ronaldo hian bul a ṭan ṭha bik lo a, a competitive match hmasa pathum aṭangin goal khat chauh a khung a, a goal khung hi penalty aṭangin a ni bawk.

King Abdul Aziz Stadium-ah erawh Ronaldo-a'n a theihna tak tak a pholang. Ronaldo hian Abdulrahman Ghareeb hnen aṭanga a ball hmuh chu minute 21-naah a ke vei lamin kawh zetin a pet goal. Minute 40-naah Sami Al-Najei through ball pek chu um lutin a ke dinglamin a pet goal leh bawk.

Second half-ah ball-in Al-Wehda midfielder Waleed Bakshween kut a per a, Al-Nassr penalty hlawh chu Ronaldo-a'n goal kilah tak kawh zetin a pet goal. Minute 61-naah Ronaldo-a'n ṭha taka khalh lutin keeper Abdulquddus Atiah-a'n a ball vawi khat petna dansak mah se Ronaldo bawkin ball per hi changin goal lina a khung.

Player ropui bik Ronaldo hian Sporting Lisbon aṭangin bul a ṭan a, Portuguese league-ah goal thum a khung. Lisbon aṭangin Manchester-ah a insawn a, English club tana a awm hmasak leh hnuhnuna a goal khung belhkhawm hi goal 103 a tling. Real Madrid-ah Ronaldo hian a vanglai hun a hmang a, Los Blancos tan La Liga-ah goal 311 zet a khung a, Serie A-ah Juventus tan goal 81 a khung leh bawk.

League goal 500 khung tling thei hi Ronaldo hmain player pali an awm tawh a, chungte chu Pele (604), Romario (544), Josef Bican (518) leeh Ferenc Puskas (514) te an ni. Lionel Messi pawhin league goal 490 a nei tawh a, goal 500 a khung tlin thuai a rinawm.

Ronaldo khelhna Al-Nassr hi Saudi Pro League-ah hmahruaitu an ni mek a, match 16 aṭangin point 37 an hmu. An elpui Al-Shabab pawhin point 37 an hmu a, match khatin an khel tam thung.