West Ham hmaah Chelsea fiahna

Chelsea-in nipui leh thlasik bazarah player thar 17 ngawt an la a, an sum sen zat chu pound maktaduai 600 bawr vel a ni. Blues hian sum an sen tam avangin ngaihven an hlawh a, zanin dar 6:00-a West Ham an hmachhawn tur hi fiahna ṭha tak a ni thei ang.

Graham Potter-a'n squad a neih chhah avangin player ngai a chhawr meuh lo a, English manager hian team ṭhat dan ber tur a la hre lo a, chak dan tur zawngin player a siksawi chho zel.

Thlasik bazar zawh hnuah Chelsea hian goal zawnah vawi thum chauh an la pet a, goal an la khung lo bawk. Potter chuan, "Player kan lakluh chhan chu tuna mi tur leh nakin huna mi tur atan a ni," tiin an player ṭhenkhat chu intuai hriam an la mamawh thu a sawi.

Blues tana thu lawmawm chu Joao Felix-a'n hremna a hmang zo a, Hammers a hmachhawn leh thei tawh dawn. Arsenal aia Chelsea thlangtu Mykhailo Mudryk pawhin bul a ṭan leh a rinawm a, midfield-ah N'Golo Kante a la inhliam avangin Enzo Fernandez chu midfield khaipa a ni thei ang.

Chelsea hian Liverpool leh Fulham-ah goal an khung tawh lo a, West Ham lakah goal khung ngei a ṭul tawh dawn. Chutihrualin David Moyes-a hote hian St James Park-ah Newcastle United an chelh thei a, Blues hi an mual London Stadium-ah an mikhual dawn. Hammers hian tun season-ah bul an ṭan ṭha lo a, point 19 chauh la hmu mah se Chelsea tan zuam ngawt a rem lo.