Villarreal hmaah Barcelona tan fiahna

La Liga hmahruaitu chu Barcelona an ni a, an hnuai chiaha awm Real Madrid aia an sanna chu point riat a ni - Pathianni zan dar 1:30-ah Barcelona hian league match khel turin Villarreal an lenchilh dawn a, Real nena an inkara point riat lai a awm theih chhan langsar chu Villarreal hi an ni.

A chhan maw? Villarreal hian January thlatir khan league match-ah 2-1 in Real Madrid hi an lo hneh tawh a, point thum an hlawhchhuah bakah Barca leh Real inkar a zau theih nan Catalan club chu hna ṭha tak an thawhsak tel.

Pathianni zanah erawh team pahnih inkar sawr zim thei dinhmunah Villarreal an ding leh ta thung a, Club World Cup khela thangbo Real Madrid-in beiseina nen an lo thlir ang!

Kartawpa La Liga club langsar dang inlan tur zingah Atletico Madrid chu Pathianni zan hian an inlan dawn bawk a, khualmualah Celta Vigo an lenchilh dawn - season thara Champions League khelh tum Atletico tan tlawm a thiang lo. An zam lo

Barca-in season duhawm tak an hmang mek a, tun season-a league match 20 an khelh tawhah vawi khat chiah an la tlawm a, an ngam loh awmchhun hi Real Madrid an ni.

Catalan club hian Real laka an tlawm hnuah league match 11 khel leh tawhin vawi 10 an chak a, vawi khat draw an nei - an kaltluang hle. Mahse, he kaltluang lai titawp tur hian Villarreal defender Pau Torres chuan hlauh an neih loh thu a sawi.

Torres chuan, "An phur vanglai a ni a, game an thunun hneh ṭhin hle. Ball chan tam duh team an ni a, ṭum dang zawng aiin an kaltluang. Mahse, ṭha taka kan nawr a, rilru fim taka kan khelh chuan hlawkna tur tam tak kan nei.

"Season duhawm tak hmangin, game tam tak an thunun. Mahse, ball chan tam duh Barca ang team lakah kan khel ṭha ṭhin a ni," a ti a, a inringtawk hle.

Mahse maw...

Torres-a'n Barca hlau lo mah se Yellow Submarine tan striker chhuanvawr Gerard Moreno-a'n training a zawm lo nia sawi a ni a, Spanish striker awm loin Villarreal tlarhma an hlauhawm lo sawt ang, tih a chiang.

Hriat tel atana ṭha erawh Villarreal boss hi Barcelona coach hlui Quique Setién a ni a, Spanish coach tawnhriat nei ṭha hian Barca hneh dan tur chu hre ṭha tawkah a inngai ang.

Setién kaihhruaina hnuaiah Villarreal hian league match kua khel tawhin, vawi li an chak a, vawi khat an draw - an league match hnuhnung pahnihah Rayo Vallecano (1-0) leh Elche (3-1) an ngam lo a, insiamṭhat tum lai taka Barca hmachhawn hi a nihna takah chuan an chak a rinawm lo.

Catalan club tan Robert Lewandowski, Raphinha, Gavi leh Pedri te hoin he thu buatsaih a nih thleng hi chuan harsatna an nei lo a, Yellow Submarine laka point thum beisei ngam tur an ni.