Napoli-in kawng dik an zawh thei ang em?

Khawvelin Napoli chanchin an hriatrengna chu Diego Maradona hoa an champion kha a ni a, Naples khaw club hian kum 1990 hnuah Serie A nomawi 'scudetto' an chawi leh tawh lo. Tun season hian Napoli hian champion theihna hun ṭha an nei a, match 21 khelh tawhah point 13 zetin hma an hruai tawh.

Pathianni zan dar 1:15 hian Napoli hian table mawngphaha awm Cremonese an mikhual dawn a, point thum hmuh belhna remchang a ni thei ang. Napoli hian nikum October thla han Cremonese hi khualmualah 4-1 in an sawp tawh a, tun ṭumah pawh an chak nawn ngei a rinawm hle.

Napoli striker Victor Osimhen chuan season ṭha tak a hmang a, tun season-ah goal 16 khungin assist vawi thum a nei tawh. Nigerian striker hian goal 16 khung tur hian goal zawnah vawi 28 a pet a, ṭhiante tan vawi 18 chance a siam tawh bawk.

Kum 24 mi Osimhen hi Europe club lianten an ngaihven a, chutihrualin club president Aurelio De Laurentiis erawhin an hralh loh tur thu a sawi tawh. Mahse, sumin thil a ti thei a, English club lianten sum ṭhahnem tak nena an dawr a nih ngat chuan De Laurentiis pawh hian a thusawi a zuk thei

ngei ang.