Nagelsmann-a'n Cancelo a fak

Bayern Munich chuan thlasik bazarah loan hmangin Joao Cancelo an lalut a, Portuguese defender Cancelo khelh hnuah Bayern hian Mainz (DFB Pokal) leh Wolfsburg (Bundesliga) te chu 4-0 leh 4-2 in an hneh. Bavarians hian zanin dar 8:00 hian Bochum an mikhual dawn a, Cancelo hnuah match zawnin vawi thum an chak thei dawn tihna a ni.

Bayern manager Nagels-mann chuan, "Frankfurt nen kan inkhelh zawh khan kan club sporting director Hasan Salihamidzic chuan lak theihna chance a awm thu a sawi a, hemi hma pawh hian a chanchin hi kan sawi dun tawh. Position hrang hrangah a khel thei a, goal nawr kawnga player ṭangkai a nih avangin kan team tan pawh Cancelo lakluh hi a pawimawhah kan ngai," tiin a sawi.

Rinlawk ang ngeiin Portuguese defender Cancelo hian goal nawr kawngah Bayern a pui nghal a, match hnih lekah Bavarians-in goal riat an khung. Hemi hma match thum thlirlet chuan Bayern hian match thumah goal thum chauh an khung.

Nagelsmann chuan, "Cancelo hian vei lama khelh aiin dinglama khelh a duh zawk. Box chhungah ball a luhpui thei a, goal-ah ṭha takin a pet thei a, chutiang bawkin ṭha takin a cross thei bawk. Tawnhriat ṭha tak a nei a, tum sang tak a neih avangin team tan a pawimawh a ni," tiin a sawi.

Bayern hian Bochum an hmachhawn zawh hian Champions League-ah PSG an hmachhawn dawn. February 14, Thawhlehni zan hian Bayern-in Paris an tlawh dawn a, PSG hi Lionel Messi, Neymar leh Kylian Mbappe te awmna a nih avangin an inkhel tur hian ngaihven a hlawh hle.