Jamshedpur leh Bagan an inhnehtawk

Ningani zan Indian Super League inkhelah goal a lut lo a, Jamshedpur FC leh ATK Mohun Bagan chu 0-0 in an inhnehtawk - playoff khelh tum Bagan tan draw result hi a pawi thui thei.

Bagan-in inkhel an thunun zawk rualin, Jamshedpur-in chakna chance an nei a, an hun khawhral a uiawm takzet - Manipur forward Boris Singh chuan Australian striker Harry Sawyer siamsak chu holam takin a hlah.

Hei chauh a ni lo - Arsenal player hlui Jay Thomas chuan Daniel Chima Chukwu tan awlsam taka khung turin a siamsak a, mahse, Nigerian striker hian goalkeeper chauh a hmachhawn chungin a khung thei lo.

Jamshedpur lamah si ban nghaktu TP Rehenesh chu fak phu a ni - Kerala keeper hian minute 90 chhungin vawi sarih save a nei a, Dimitri Petratos chance neih vawi hnih a dansak te, Manvir Singh leh Federico Gallego chance neih a dante chu sawi hmaih a thiang lo.

Men of Steel tan Ricky Lallawmawma leh Laldinliana Renthlei ten bul an ṭan a, an khel ṭha dun hle - Bagan lamah Lalrinliana Hnamte leh K. Lalṭhathanga (Puitea) awm mah se an inlan lo.

Season hmasa ṭha taka hmangtu Puitea hian thlasik transfer-ah khan Bagan hi a zawm a, Kolkata club a zawm tirhah hmun chang mah se tun hnaiah erawh a inlan tam lo hle.