Jaipur-a roreltu Ṭhazuala

All India Sub-Junior Ranking Badminton Tournament, 2023 final chu nimin khan Jaipur, Rajasthan-ah khelh a ni a, Mizo rawlthar H. Lalṭhazuala chuan Under-17 Boy's Singles inelnaah champion nomawi a chawi.

Chanmari West rawlthar Ṭhazuala hian final-ah seeded no. 5 Malemnganba Singh Hemam chu 21-16, 21-15 in a hneh a, final kalkawnga a hneh zingah seeded no. 2 Ronak Chauhan leh seeded no. 8 Radjev Tomar te pawh an tel a, Jaipur khawpuiah Ralte Villa Badminton Club player-in ro a rel.

February 5 aṭanga neih ṭan inelnaah hian entry 1558 lai a lut a, hetiang ang inelnaa Ṭhazuala a champion thei hi a ropui hle - thawnthu thar ziahin a awm a, a vawi khat nan national huap singles inelnaah Mizo an champion.

Under 15 Boy's Doubles inelna huangah Malsawmhlua chuan a ṭanpui, Andhra Pradesh lam mi Mahendra Kalahasthi nen final an lut bawk a, mahse, Ralte Villa Badminton Club player tho, Serchhip rawlthar Malsawmhlua leh a ṭhianpa hian Ishaan Negi, Uttarakhand leh Arnav Sharma, Rajasthan te ṭangdun chu 21-11, 21-15 in an hneh lo thung.

All India Sub-Junior Ranking inelnaah hian Lalramsanga, Durtlang leh Lalrempuii, Serchhip te ṭangdun chuan Under-17 Mixed Double- ah quarterfinal an thleng a, Sainunmawia, Ramhlun Venglai leh a partner Aanya Bisht te pawh Under - 17 Mixed doubles-ah hian a thiam pariat zingah an invaw kai phak bawk a ni.

India ram inelna liana Mizote tihmingṭhatu Mizo naupangte hi TATA Trusts leh Mizoram Badminton Association ṭangkawpin an din Regional Development Centre aṭanga inzir chhuak, chumi hnua Pullela Gopichand Badminton Academy leh ITM University Badminton Academy, Raipur a inzir chhunzawm tura thlanchhuah te an ni a, an zir man zawng zawng hi TATA Trusts tumsak a ni.

Mizoram Badminton Association chuan thuchhuah siamin, TATA Trusts leh badminton hmasawn nana tha leh zung sengtute chungah lawmthu an sawi a, Mizo naupangte an chhuan thu an sawi bawk.