MSL8-ah BCA leh TBL an chak chiang; Vawiin tlaiah an intawng dawn

Mizoram Super League (MSL) champion lai Zarkawt BCA chuan tun season an match hmasa ber atan Chanmari Vikings chu 101-72 in an sawp a, anmahni ang bawka team ṭha Khatla TBL chuan Champhai District BBA chu 115-62 in an hneh ve bawk.

MSL team hlun leh lian pahnih TBL leh BCA te hi vawiin tlai dar 5:00 hian R. Dengṭhuama Indoor Stadium, Mualpuiah an intawng zui dawn, tualchhung basketball ngainatute tan chuan hmaih phal chi a ni lo ang.

Season ṭan hmain Zarkawt BCA coach Lalruatfela chuan, "Kan inbuatsaihna a ṭha, kan inringtawk," tiin Vanglaini a hrilh a, a thu sawi ang ngeiin an match hmasa berah an hmuhnawm nghal hle, tualchhung player an neih ṭhat a lang leh bawk.

Lalrina Renthlei (21 points), Zonunsanga (11), Matthew Remtluanga Sailo (6), Joseph Allen (40) leh Reuben Lalsangkima ten bul an ṭan a, a tir aṭanga a tawp thlengin hnufual lai nei loin an chungnung a, point 30 zeta hmahruai fal lai pawh an nei hial.

MSL tir lam season hnihah TBL an chungnung, tun hnai season li chhung erawh BCA kuta awm a ni thung. Tun ṭum an inkhel turah pawh hian Zarkawt club hi rinkai zawk an ni dawn, chutihrualin fimkhur a ngai ve khawp ang.

Mizo player ṭha leh tawnhriat nei an kawlkhawm a, anni tha tichak zual tur hian season hmasa lam an champion theihna chhan Allen an nei nghal bawk. MSL 7 Most Valuable Player ni thei Florida tlangval hian Mizo player nena khelh dan a thiam tawh hle.

Khatla TBL pawhin hmasawn an tum - Vikings tana MSL nomawi chawi tawh H. Lalhruaitluanga chu manager atan an la, ani hi MSL bakah Mizoram team kaihruai fo tawh a nih avangin team enkawl kawngah a pawimawh dawn.

Hruaia chuan, "MSL bikah chuan Vikings ni lo ka enkawl hmasakna tur a ni a, a boruak a danglam ve khawp mai, kan hmaa chona awm hlenchhuah kan tum ang chu," tiin Vanglaini a hrilh a, an naute a ringtawk hle.

TBL hian player pawimawh K. Lalthianghlima chu zirna vangin match hmasaah an chhawr thei lo, vawiin tlaiah erawh forward Thianga hi a inlan thei dawn, minute a nei rei nghal thei ang em, tih erawh sawi lawk a harsa.

Thianga hi tualchhung player ṭha bik zinga mi a ni a, nikum khan India senior team tana khel turin koh a lo ni tawh. India tan hian Lalrina Renthlei te nen koh an ni a, ram tan chuan team khat ni mah se MSL lamah erawh an inel dawn.

Zanin dar 8:30 hian Bungkawn LB Associates leh Chanmari Vikings te an inkhel dawn bawk, anni pahnih hi match hmasa lama chak lo ve ve an ni. Team pariat zingah a sang pali chinin semifinal an khel dawn a, mahni elpui team hneh theitu nih a pawimawh ang.