Chelsea tan chak a harsa!

13th February, 2023

January transfer-ah pound maktaduai 300 chuang ngawt an seng a, mahse, Chelsea-in point thum an hlawhchhuah theih phah chuang lo - thlasik transfer khar hnua an match hmasa pahnih aṭangin point khat chiah an la hlawh chhuak.

Inrinni zan khan Chelsea hian khualmualah West Ham an lenchilh a, tun season-a team talbuai lakah pawh hnehna an chang thei lo - Hammers nen hian 1-1 in an inhnehtawk.

Chelsea tan João Félix chuan goal hmahruai khung mah se an player hlui Emerson Palmieri chuan amah duh lotu club lamah goal a khung a, hun tawp thlenga goal dang awm loin 1-1 in an ṭin.

Sum ngah ngah...lo deuh!

Chelsea boss Graham Potter-a'n tlarhmaah Kai Havertz, Mykhailo Mudryk, Felix leh Noni Madueke te a tlar thei a, pound maktaduai 200 chuang man an ni - goal pawh minute 16-na lekah Félix hmangin an khung a, Chelsea fans an phur.

Felix-a'n goal a khung hma hian offside vangin a goal khung pawm loh a ni tawh a, hei hian an goal nawr natzia a hrilhfiah. Mahse, Chelsea hlim chhung chu chhum rei lotê lang a, ral leh ang mai a ni!

Goal an chhuah aṭanga minute 12-na lekah Emerson chuan Jarrod Bowen-a ball tauh ṭha zet chu si phurh sutna goal ni turin a khung a, hun tawp hnaih lama Tomas Soucek goal khung an pawm lo mah mah.

A har a ni

Chelsea an chak zo lo a, chutihrual chuan an game-ah erawh hmasawnna hmuh tur a awm. Felix bakah Havertz-a goal khung pawmsak a ni lo a, £30.7mtd man Madueke-a chance leh Felix-a freekick Lukasz Fabianski-a'n a dante chu Chelsea vanduaina belhchhahtu a ni - Conor Gallagher khung ngei tur chu Soucek-a'n a kutin dang mah se video assistant referee hmanga ennawn a ni lo a, Blues tan a na ang.

London club hian Premier League-a an match hnuhnung, point 21 hmuh theihna aṭangin point sarih chiah an la hlawh chhuak a, Graham Potter hi an coach a ni zel ang em, tih chu inrinsiak a ngai ta.

League Cup leh FA Cup aṭangin an tla tawh a, Premier League top four chu point 10-in an hlat mek - Chelsea hian Nilaini zan dar 1:30-ah Champions League last 16 first leg khel turin Borussia Dortmund an lenchilh ang.