Aizawl FC mikhual tur RoundGlass

Vawiin tlai dar 4:30 hian RG Stadium-ah Aizawl FC-in Mizo tamna RoundGlass Punjab an mikhual dawn. Mizo club-in match hnuhnung pahnihah Mohammedan SC leh Rajasthan FC te an hneh thei a, Punjab an hneh leh a nih chuan a zawnin vawi thum an chak dawn.

Aizawl FC hi table-ah paruknaah an awm mek a, an chak a nih chuan table chunglamah an awm thei dawn. Mizo club tana chanchin lawmawm chu an striker thar Ivan Veras-a'n match hmasa berah bench aṭanga lutin chakna goal a khung nghal.

Rajasthan FC lakah bench aṭangin HK Lalhruaitluanga leh K. Lalrosanga te an lut a, anni paw hi an rintlak viau. Mizo club coach Caetano Pinho-a'n rin tur a ngah sawt.

Chutihrualin vawiin tlaia Aizawl FC hmachhawn tur RoundGlass Punjab erawh champion beisei ngam zinga mi an ni a, a awlsam dawn lo.

Punjab hian I League-a Aizawl FC champion puitu Brandon VL Remdika bakah Samuel Lalmuanpuia, Hmingthanmawia (Valpuia), Freddy Lallawmawma leh Daniel Lalhlimpuia te an kawl.Samuel, Valpuia leh Daniel te hi ISL thlenga tawnhriat nei ṭha an ni.

RoundGlass hian match nga chhung chak loh an nei tawh lo a, Slovenian striker Luka Majcen-a'n match 14-ah goal 10 khungin assist vawi hnih a nei tawh. Punjab striker Majcen hi a thawkrim a, Mizo club tan pawh a hnawksak ang.

Aizawl FC-in table chunglama mi RoundGlass Punjab hneh tur chuan mipui puihna an mamawh dawn. Nikum November thla khan Punjab-in an mualah Mizo club hi 2-1 in an hneh a, Aizawl FC-in vawiin tlaiah hneh let an tum dawn a ni.

Zirtawpni zan khan Trau-in Churchill Brothers 3-2 in an hneh a, Manipur club hi a sang pathum zingah an awm tawh. Irinni khan Real Kashmir leh Neroca te 2-2 in an inhnehtawk bawk.