Nipui a thâw ṭan - Arsenal zia a chhuak!

Premier League champion nih an tum a, fal taka kal theihna remchang pawh an nei - a chung berah la awm mah se tun hnaia Arsenal inkhel a nghet tawk lo, point an hloh leh tak avangin an dinhmun chu na taka sawinghin a ni mek.

Inrinni zan EPL inkhelah Gunners hi an mikhual Brentford nen 1-1 in an inhnehtawk. North London club tan substitute Leandro Trossard chuan goal khung mah se, mikhual lamin striker Ivan Toney hmanga si phurh sutin point khat an insem.

Emirates boruak

Premier League season kal laiah Emirates Stadium hi mikhual tana inkhelh harsatna hmun a ni. Mikel Arteta naute hi anmahni mualah an tlawm lo a ni satliah lo a, match kua an khelh zinga pariatah an chak - vawi khat chu an khingpui nen an inhnehtawk.

Inrintawkna sang tak nen Brentford an lo mikhual a, manager Arteta-a'n a player hman thiam pangngai 11 bawk bul a ṭan tir, ball an chang tangin inkhel pawh an thunun angreng hle, fans puihna an dawng ṭha bawk.

Mahse, Bees tlarhnung an inveng thiam tlat - an chesual duh mai mai lo. Gabriel Martinelli la chhuakin Trossard dah luh a ni. Belgium international hian Bukayo Saka-a cross a khung, awmna tur hmun a thlan dik vang a ni.

Amaherawhchu, mikhual team lamin remchang an insiam fuh. Minute 74-naah Toney chu siphurh sutna goal a tauh lut, English striker hian tun season Premier League match 20 aṭangin goal 14 a khung a, an team point hmuh nan a tawk. Gunners goal chhuahna hnuhnung pathum hi an khingpuiten an tauh goal vek a ni.

Arteta lungawi lo

Goal an chhuah danah Arsenal manager Mikel Arteta a lungawi thei lo, match official lamin dan leh hrai an thlak danglam ni mai a hriat thu a sawi hial. Toney-a'n goal a khung dawn khan Ethan Pinnock chu a offside ngei niin a lang.

Thil thleng hi hun rei tak chhung video assistant referee (VAR) hmanga endik a ni a, goal atan pawm a ni. Arteta chuan, "Chiang takin ka hmu a, ka ennawn leh pawhin chiang takin a offside, nakinah sawifiahna chu kan hmu leh ang, mahse point kan hmuh phah si lo.

"Camera lamin an lak fuh tawk loh vang pawh a ni mai thei e, goal lo tur goal atana an pawm avangin goal hnih kan hloh," tiin an goal chhuah danah a lungawi lo a, chutihrualin Toney hian first half-ah goal ngeina turah crossbar a pet per.

Offside chungchang sawiin Brentford coach Thomas Frank chuan, "Ball an pet chhuah lai kha chuan Ethan Pinnock kha a offside ngei mai. Chumi rual chiah chuan football dan ang chuan, goal luh nan khan midang a lo tibuai em tih kan en tel a ngai," tiin a sawi ve thung.

Arsenal zia

Premier League table chung berah Arsenal an la awm chuan Krismas a la hla tihna, an ti fiamthu ṭhin. Krismas a zawh hnu pawhin Gunners chu a chung berah an la awm a, mahse season dang angin season chawhma lamah match an khel tam tawk lo.

January thla chu boruak vawh vanglai a ni. February thla a ni a, boruak a inthlak ṭan - a vawt lutuk kha a reh dawn hnai. FA Cup aṭangin Arsenal an tla a, an league match hnuhnung pahnihah Everton leh Brentford nen an inhnehtawk.

Arteta-naute hian Manchester City lakah point rukin hma an la hruai. Citizens nen hian Nilaini zanah an intawng zui dawn, tun kar chhung lekin champion leh champion loh boruak a inthlak danglam hlawk thei dawn niin a lang.

Nizan khan Pep Guardiola naute hian Aston Villa an hmachhawn a, result kan hre hman lo. Man City hian Villa an hneh a, an match lehpekah Arsenal an hneh zui leh bawk a nih chuan hma an hruai thei dawn - nomawi inchuh boruak a ngaihnawm zel.