ISL-ah Mizo hming a mawi leh ta

Indian Super League tawp a hnai tual tual a, Mizo player an langsar tulh tulh - Zirtawpni zan khan Odisha chuan playoff khelh an beiseina chhi nung turin Hyderabad chu 3-1 in an hneh a, Isak Vanlalruatfela chuan goal mawi bik a khung.

Hyderabad tan tun season-a vawi thum an tlawmna a ni a, Isaka bakah Nim Dorjee Tamang (own goal) leh Diego Mauricio ten Odisha tan an khung bawk a, Hyderabad tana Nim Dorjee goal khungin awmzia a nei phak lo.

Inrinni zan khan Mumbai City chuan 5-3 in FC Goa an hneh a, Mumbai tana goal khungtu zingah Lallianzuala Chhangte (penalty) a tel - Mumbai hi league round hmahruaitu an ni chiang ta chiah a, India aiawhin AFC Champions League an khel ang.

Hetihlai hian Bengaluru chuan Roy Krishna goal hmangin Kerala Blasters chu 1-0 in an hneh bawk a, ISL playoff khelh beiseina an la nei ve zel.

Ṭawngṭaina rah

Odisha tan playoff khel turin tlawm a thiang tawh lo a, an beiseina chhi nung turin Isak-a'n minute 33-naah goal mawi bik a khung - Hyderabad-in Nim Dorjee hmangin chhanglet mah se Dorjee vek hian an lamah tilutin, Mauricio chuan a khung ve leh bawk.

Isaka chuan, "Mihring takin kan ṭang bawk a, a hahthlak ṭhin hle. Ka chhungten nasa takin min ṭawngṭaipui reng a, kan inkhelh dawn apiangin chaw nghei ṭawngṭai ka nei ṭhin bawk - Pathianin ka ṭawngṭaina a chhang a ni," tiin Vanglaini a hrilh.

Thingsulthliah tlangval chuan sawi zawmin, "Ka tan hian Lalpa hi a ṭha em a ni. Season ṭantirah hliam neuh neuhin min tlak buak a, ka rilru chu a beidawng ve hman viau. Mahse, Pathianin chakna thar min pe a, ka thawhrah a ni lo. 'Chawimawi la, anin a chawisâng ang che,' tih kha a ni mai - engkim hi Pathian min pek a ni," a ti.

Isaka hi tun season-a a vawi hnih nan hero of the match-ah thlan a ni a, lawmman pek a nih laiin, Deuteronomy 6: 4-5 thu, "Aw Israel mite u, ngaithla teh u, LALPA kan Pathian chauh chu LALPA a ni a; LALPA in Pathian chu in thinlung zawng zawngin, in rilru zawng zawngin, in chakna zawng zawngin in hmangaih tur a ni," tih chu a sawi chhuak.

A hming Lianzuala

Mumbai City-in Goa khelmualah goal nga an khung a, Lianzuala bakah Greg Stewart (2 goals), Jorge Pereyra Diaz leh Vikram Singh ten an khung a, Goa tana Noah Sadaoui, Brandon Fernandes leh Brison Fernandes goal khungin awmzia a nei phak lo.

Tun season ISL-ah Mumbai club an la tlawm lo a, match 18 an khelhah vawi 14 chakin, vawi li draw an nei a, season tharah AFC Champions League an khel dawn.

Lianzuala chuan, "Tlawm nei loa kan champion kher hi chu ka beisei ngam lo. Mahse, kan chak chhoh zel takah kha chuan inrintawkna nasa tak kan nei chho a, kan game a nghet tulh tulh bawk avangin beiseina a sang. Kan thawhhona rah a ni a, ka tan erawh a bul berah chuan Pathian a ni a, a awmpuina a ni, tih chiang takin ka hria," tiin Vanglaini a hrilh.

Lunglei tlangval Lianzuala hian tun season ISL-ah match 18 khelin goal 10 a khung tawh a, assist vawi ruk a nei bawk - January Hero of the Month-ah thlan a ni.