Khawvelah Real Madrid an thiam ber

FIFA Club World Cup final-ah goal riat zet a lut a, Real Madrid an champion. Real hian Asian champion Al-Hilal chu 5-3 in an hneh a, CWC-a champion ngun ber an ni - vawi nga an champion tawh.

Real tan Vinícius Júnior leh Federico Valverde ten goal hnih ve ve an khung a, Karim Benzema chuan goal khat a thawh ve bawk - Al-Hilal tana Luciano Vietto goal hnih khung leh Moussa Marega goal khungin awmzia a nei phak lo.

Spanish champion hian 2014-18 inkar khan CWC nomawi pali an lo chawi tawh a, kuminah an belhchhah leh ta. CWC hnuhnung 10-ah European club vek an champion. FIFA chuan June 2025 aṭang chuan team 32 inelna turin ruahmanna a siam a, mipuiin an ngaihhlut zawk nan kum li dana CWC khelh tawh tura ruahmanna siam a ni bawk.

A hmuhnawm

Real boss Carlo Ancelotti-a'n Al-Hilal nen an inhmachhawn hmain champion ngei an tum thu a sawi a, kut ruaka Morocco hawsan a tum lo - final-ah sawi lawk ang ngeiin Real an ṭang a, minute 18 chhung lekin Vinicius leh Valverde goal hmangin 2-0 in hma an hruai.

Al-Hilal-in awlsam taka Real chaktir an tum bik lo tih pholangin, Porto forward hlui Marega hmangin si phurh an sut ṭhen a, inkhel a hmuhnawm takzet - chawlhlawk hmain 2-1 a ni der.

Second half-ah pawh a hmuhnawm chhunzawm. Real-in team ṭha zawk an ni tih pholangin, second half minute 13 chhungin Valverde leh Benzema hmanga khung lehin, Asian champion an sawp dawn niin a lang.

Zam ve lo

Mahse, semifinal-a Flamengo hnehtu Al-Hilal an zam lo. Minute 63-naah Atletico Madrid striker hlui Vietto chuan a khung ve leh a, 4-2 a ni. A tawpkhawkah erawh team ṭha zawk leh squad chhah zawk danglamna a lang a, Vinícius chuan an goal ngana khungin, Vietto-a'n goal khat khung ve leh mah se awmzia a nei phak lo.

Real boss Ancelotti chuan, "Kan player-te inhliam an dam ṭan a, he nomawi hian kan season hmabak atan phurna nasa tak min pe ang. Inelna zawng zawngah a tawp thlengin kan bei dawn a ni," a ti.

Al-Hilal laka Real chak zanah thil danglam a thleng a, chu chu Valverde-a'n goal hnih a khung kha a ni. Uruguayan midfielder hi season tirah Ancelotti-a'n tun season-a goal 10 khung turin a inchawi pui a, King Carlo hian a player chuan goal 10 a khung loh chuan coaching a bansan tur thu a hrilh - goal hnih a khung khan tun season-a goal 11 a khungna chiah a ni!