Islam Makhachev-a'n a title a humhim

Nimin khan Islam Makhachev chuan UFC lightweight title a kawl lai chu a humhim - Alexander Volkanovski chu unanimous decision (48-47, 48-47, 49-46) in a hneh a, fight hmuhnawm bik tia chhal ngam a ni.

Perth, Australia-ah Makhachev chuan awlsam takin a chak lo tih a pawm a, kum 31 mi fighter chuan, "A awlsam dawn emaw ka ti a, mahse, he fighter hian awlsam taka hneh chi a ni lo, tih a pholang a ni," tiin a sawi.

Volkanovski-a'n UFC-ah vawi 12 zet a zawnin hnehna chang mah se Makhachev hmaah a tlawm ta a, hetihlai hian Makhachev chu October 2015-a Adriano Martins laka a tlawm hnuin, vawi 12 zet a zawnin a chak ve ta chiah thung.

Beiseina

Makhachev hian October 2022 khan Charles Oliveira hnehin, UFC lightweight title chu a hlawh chhuak a, a fight hnuhnungah a chak awlsam ṭhin avangin a lakah mipui beiseina pawh a sang.

Hetihrual hian Alexander Volkanovski theihna hmuh hmaih theih a ni bik lo. December 2019-a Max Holloway a hneh khan UFC featherweight champion a ni a, hemi hnuah hian vawi li zet a title a humhim tawh.

Mahse, Australian fighter hian a duhtawk mai lo - Conor McGregor, Amanda Nunes, Daniel Cormier leh Henry Cejudo te hnungzui tumin, UFC weight division hniha champion châkin, Makhachev hmachhawn turin lightweight-ah a insawn chho.

A hmuhnawm

Mahni khawtuala inkhel, Australian tlangval Volkanovski-a'n rinlawk ang ngeiin ṭantu a ngah a, mipui puihna leh a huaisenna nen Makhachev lakah a ti thei hle.

Mahse, Makhachev hian a wrestling thiamna leh counter striking a hmang ṭhangkai a, fight inhnehtawk taka a chungnun zawkna chhan pawh niin a lang - a tawpah judge pathumin chak zawkah an puang vek.

Makhachev hian a coach leh mentor ni bawk, mi tam takin MMA fighter ropui bera an ngaih Khabib Nurmagomedov tel loin fight hi a hmachhawn a, January thlaa a chhungte nen hun tam zawk an neih theih nana MMA hawisan rih tura insawi Khabib tel loin a title erawh a humhim ta tho.

Volkanovski chuan, "Mipui thlawpna avangin ka lawm a, mahse, Islam-a tan kut i beng ang u. Ka tlawm lai hmuh châkte tan chuan result lawmawm a ni ang a, mahse, nuam ka ti hle. Chak chung ngeia thusawi chu ka duh alawm, mahse, mahni theihna fiah ve fo hi a ṭha - chu chuan min tichak fo ṭhin a ni," a ti a, a chak loh a pawm thiam hle.