PSG-in chak dan an theihnghilh

French Cup aṭangin Paris Saint-Germain an tla a, Paris club hian Inrinni zanah Monaco chu Ligue 3-1 in an hneh lo.

Neymar telna PSG hian February 14, Thawhlehni zan hian Bayern Munich an mikhual dawn a, inhliam vanga Lionel Messi leh Kylian Mbappe te an khelh theih dawn loh avangin hmabak a ko hle.

Mualphona

Messi leh Mbappe teloin PSG-in Stade Louis II an tlawh a, Neymar awm tho mah se Marco Verratti a inhliam bawk avangin ṭum dang angin hming langsar chhawp tur an nei tlem.

Chutihrualin Ligue 1 a nih miau avangin PSG hi rinkai zawk an la ni pha tho. Mahse mualneitu Monaco an che ṭha zawk. Aleksandr Golovin chuan minute lina lekah PSG tlarhnung pherh vangin goal hmahruai a khung.

Monaco an phur zel a, Youssouf Fofana-a'n PSG keeper Gianluigi Donnarumma tan a siam. Monaco captain Wissam Ben Yedder chuan PSG tlarhnung su tlangin minute 18-naah chiang takin a khung.

PSG tan Warren Zaire-Emery-a'n Juan Bernat-a thawhrah sengin goal ruakah khung ve bawk mah se Monaco-in chance a ngah zawk. Donarumma a che ṭha a, dan vek sen a ni lo. Ben Yedder-a'n first half injury time-ah Monaco goal thumna a khung.

Second half-ah goal a lut tawh lo a, PSG 3-1 in an mualpho. French champion hian match 23 aṭangin point 54 an hmu tawh a, league-ah hmahruaitu la ni thoin pahnihna Marseille aiin point ngain an hmu tam zawk.

Nomawi a pawimawh

PSG-in player langsar bik Messi, Neymar leh Mbappe te an kawl miau avangin nomawi chawi theih angte chawi vek thei tura beisei a ni a, Ligue 1-ah erawh an ṭhat ber miau avangin an champion ngei a la rinawm hle.

Mahse, Champions League-ah erawh an ṭha ber ta bik lo. PSG hian an talbuai lai takin German champion Bayern Munich an hmachhawn dawn a, Christophe Galtier-a'n Paris club hi UCL-ah a champion pui thei lo a nih chuan manager hna chelh reng a har ang.

PSG hian Champions League nomawi an la chawi ngai lo a; manager langsar Carlo Ancelotti, Laurent Blanc, Unai Emery, Thomas Tuchel leh Mauricio Pochettino te an hlawhchham tawh. Galtier hian Bavarians an mikhual hmain a naute a fuih phur hman a ṭul ang.