Bayern Munich an chak nuamsa

Bayern Munich chuan Zirtawpni zan khan inkhel thunun chungin VfL Bochum chu inkhel thunun chungin 3-0 in n hneh. Bavarians hian Champions League-ah Paris-Saint German an hmachhawn dawn a, Julian Nagelsmann-a hote match pawimawh khelh hmain an insiamṭha hman.

Bundesliga-ah Bavarians-in hma hruai mek mah se an hnuai chiaha awm Union Berlin-in an um ve zel. Urs Fischer hote hian an elpui RB Leipzig chu khualmualah 2-1 in an hneh a, Bavarians hi point khat chauhin an pha lo.

Allianz Arena-ah bayern an nung ṭha a, Thomas Muller-a'n Bochum tihsual hmang ṭangkaiin minute 41-naah a khung. Muller hi goalkeeper chhiar tel loin Bayern tana Bundesliga match khel tam ber a ni a, match 428 khelin Gerd Muller-a record a khum. Minute 64-naah Kingsley Coman-a'n Jamal Musiala ball pek chu khung lehin minute 73-naah Serge Gnabry-a'n a penalty hlawhchhuah chu goal-ah a chantir leh bawk.

Bayern hian kum 2023 bul an ṭan ṭhat loh hnuin Joao Cancelo an lakluh hnuah an insiam ṭha zel. Bochum lakah hian Leon Goretzka chuan defensive midfield hna chelhin a rintlak viau.

Nagelsmann-a'n bench aṭangin Arijon Ibrahimovic a rawn luhtir a, kum 17 mi midfielder hian hmabak eng tak a nei. Ibrahimovic hi Nuremberg, Germany-a piang a ni a, a nu leh pa te erawh Kosovan niin Sweden striker lar Zlatan Ibrahimovic nen inzawmna an nei lo.