Milan tan Olivier Giroud

Olivier Giroud chuan AC Milan tan a hunah tak a theihna a pho chhuak leh ta. France international striker hian Torino lakah goal khat a tauh lut a, tun hnaia chak ni hmel hmu khat tak Milan chu 1-0 in hnehna a chanpui.

February 10, Zirtawpni zan inkhelah Giroud hian minute 62-naah Theo Hernandez-a cross chu a tauh lut a, tun hnaia match sarih chhung chak nei lo Milan chu an mangchhia aṭangin a kai harh.

Mikhual Torino lamin Antonio Sanabria hmangin goal khung theihna hun ṭha bik vawi hnih an nei, mahse Milan goalkeeper Ciprian Tatarusanu chuan a lo dansak ve ve a, point an hmuh theih nan a ṭangkai hle.

Hnehna chang mah se Milan tan hian Serie A nomawi humhim chu thil awlsam a ni dawn rih lo. League match 22 aṭangin point 41 an hmu a, hmahruaitu Napoli an phak lohna chu point 15 zet a ni - Naples club hian match khatin an khel tlem zui.

Milan hian Champions League lamah chona an hmachhawn zui dawn. Stefano Pioli naute hian Thawhlehni zanah Champions League last 16 khel turin Tottenham Hostpur an mikhual ang.