En châkawm PSG vs Bayern

European football inelna sang ber Champions League inkhelh hun a inher chhuak leh ta. Zanin dar 1:30 hian last 16 first leg khelh ṭan a ni dawn a, Parc des Princes-ah Paris Saint-Germain-in German champion Bayern Munich an mikhual dawn.

PSG-ah hian Lionel Messi, Neymar leh Kylian Mbappe te an awm a, chutihrualin Bayern-in sulhnu an nei ṭha zawk. French champion leh German champion inkhel tur hi last zing 16 inkhel tur pariat zinga en châkawm ber a ni hial ang.

Messi a dam?

PSG-in an match hnuhnung pahnihah Marseille leh Monaco an hneh lo. Marseille lakah 2-1 a an tlawm avangin French Cup aṭangin an tla a, Messi-a'n minute 90 chhung khel mah se malpui hliam a tuar zui.

Messi hma hian Mbappe a inhliam tawh a, Argentina captain hliam ṭumah midfielder pawimawh Marco Verratti a inhliam leh bawk. Ligue 1 match hnuhnung berah player pawimawh pathum hi an khel thei lo a, PSG hi mualpho takin Monaco lakah an tlawm.

French ni tin chanchinbu pakhat Le Parisien chuan Messi, Mbappe leh Verratti te hian Pathianni khan training an zawm thu a sawi a, bul an ṭan kher ang tih sawi lang lo mah se squad-a an awm tur thu erawh a tarlang.

Club ṭha pahnih

PSG leh Bayern hi Europe club ṭha zinga mi an nih miau avangin season hnuhnung parukah vawi li ngawt an intawng a, chung zinga langsar ber chu 2020 Champions League final kha a ni.

Bayern hian PSG hi 1-0 a an hneh avangin tun thlengin French club hian Europe-ah nomawi an la chawi lo. Kum 2021 khan club pahnih hi quarterfinal-ah an inhmachhawn a, away goal rule hmangin PSG an vannei ta zawk.

PSG hi an kim vek a nih chuan, an tlarhma pathum Messi, Neymar leh Mbappe vang ringawt pawhin an buk a rit zawk. Mahse, Bayern hi team angin an nghet ṭha zawk a, chak tur zawk rin thiam a har hle.

Thlasik bazarah Bayern hian Daley Blind, João Cancelo leh Yann Sommer te an lalut a, wing back Cancelo leh keeper Sommer ten hmun pawimawh an chang nghal. Cancelo awm hnuah Bayern goal bawh a na sawt a, goal venhim kawngah hma an sawn hret bawk.

Bayern hian Bundesliga-ah match 20 aṭangin goal 59 an khung thei a, goal 18 an chhuah. PSG hian Ligue 1 match 23 aṭangin goal 55 an khung a, goal 20 an chhuah thung. Team pahnih hian goal khung an thiam tih a lang a, chutihrualin an tlarhnung a pawp ve ve. Hei tak hi zanin inkhel tihmuhnawmtu tur a ni.

En châkawm chu

Bayern Munich coach Julian Nagelsmann chuan, "Group match-ah kan khingpui kan hneh vek a, mahse tuna kan inkhelh turah hian pawimawhna a nei tawh lo. Kan team ang thoin world class player an ngah a, UCL last 16 a nih tawh avangin a awlsam thei tawh lo hrim hrim bawk," tiin a sawi.

Bavarians hian Robert Lewandowski nei tawh lo mah se goal khung an harsat phah lo a, amaherawhchu Liverpool aṭanga an lakluh Sadio Mane a la inhliam avangin an goal bawh nat tur angin an bawh na thei lo ang.

Mahse, Ballon d'Or dawng tur zinga chhiar tel ngai loh Thomas Muller, Kingsley Coman, Serge Gnabry leh Leroy Sane te hi an khelh ṭhat ṭum chuan khawvela ṭha ber zinga mi an ni. PSG tlarhnung tan dan an har khawp ang.

Football ngainatute beiseina chu Messi leh Mbappe ten bul ṭan thei se, tih hi a ni a, World Cup 2022 final-a player langsar pahnih thlawp tur hian Neymar a la awm bawk. Mahse, PSG hian Marco Verratti bak ball semtu ṭha an nei bik lo a, hei vang hian Italian midfielder hi a dam hman a pawimawh hle.