South America-ah Brazil rawlthar an thiam ber

South American Youth Football Championship 2023-ah Brazil chuan Pathianni zan khan Uruguay 2-0 a hnehin an champion. Brazil tan final-ah Chelsea lakluh thar Andrey Santos-a'n goal hmahruai a khung a, Pedro-a'n a khung belh bawk.

Brazil captain Andrey Santos hian inelna ṭha tak a hmang a, midfielder a ni chungin goal ruk ngawt a khung. Athletico Paranaense striker Vitor Roque pawhin Brazil tan goal ruk a khung vek bawk a, ani hi Barcelona bakah Premier League club-ten an ngaihven mek.

Sudamericano Sub 20-ah hian Brazil-in record an nei ṭha ber a, vawi 12 an champion tawh. Inelnaah hian final hranpa a awmlo a, team paruk Brazil, Uruguay, inelna thlengtu Colombia, Ecuador, Venezuela leh Paraguay ten final round lutin vawi khat ṭheuh an inkhelh kual hnua point hmu sang ber an champion.