RoundGlass Punjab lakah Aizawl FC an tlawm

Nimin tlai khan RG Stadium-ah Aizawl FC-in RoundGlass Punjab an mikhual a, Mizo club-in game nung tak khel mah se champion beisei nei Punjab club lakah 1-0 in an chak lo.

Mizo club coach Caetano Pinho-a'n Rajasthan laka chakna goal khungtu Ivan Veras chu bench-ah a dah chhunzawm a, R. Lalthanmawia chu hliam vangin squad-ah a awm lo thung.

Punjab club lamah Freddy Lallawmawma leh Hmingthanmawia (Valpuia) ten bul an ṭan a, Samuel Lalmuanpuia leh Daniel Lalhlimpuia te bench-ah an awm thung.

First half-ah an inhnehtawk a, chance pawh a awm lo. Second half-ah erawh Mizo club an khel ṭha zawk a, an goal bawh pawh a na. Mahse goal hmaah Henry Kisseka leh R. Ramdinthara te ke a hmui lo.

Minute 53-naah Chencho Gyeltshen-a'n thil danglam a thlentir a, 'Bhutanese Ronaldo' hminglem an pek hian mual dinglam aṭanga lalutin a ke vei lamin ṭha zetin a pet goal.

Goal an khung hnuah RoundGlass an khel ṭha sawt a, goal dang an khung belh teuh hle. Luka Majcen-a'n goal ban a pet per a, Mizo club an vannei.

Aizawl FC an insiamrem a, hun tawp lamah a nawrtu zawk ni mah se goal hmaah an hriam tawk lo. Substitute Veras-a'n a hun ṭha neihah a pet na tawk lo a, Hnahthial tlangval Jakob Vanlalhlimpuia pawhin danglamna a thlen thei lo.

Mikhual RoundGlass Punjab 1-0 in an chak a, khelh zat inangah pakhatna Sreenidi Deccan nen point 37 ve ve an hmu. Mizo club erawh an chak zawh loh avangin point 23 hmuin paruknaah an awm chhunzawm a ni.