Buaina karah Man City an buai lo!

Premier League champion Manchester City chu khelmual pawn lamah buainain a chim mek a, khelmual chhungah erawh Pep Guardiola naute hi an buai hran lo. Citizens hian an mikhual Aston Villa chu 3-1 in an hneh.

Pathianni zan Etihad Stadium-a inkhelah Man City tan Rodri, Ilkay Gundogan leh Riyad Mahrez ten goal khat ṭheuh an khung, mikhual Villa tana Ollie Watkins goal khungin beiseina siam ve bawk mah se an khung belh thei lo.

Thawhlehni zanah Man City hian Emirates Stadium an tlawh dawn, hmahruaitu Arsenal hi an luhchhuah thei a nih chuan Premier League hmahruaitu an ni thei der dawn, nomawi inchuh team inkar hi a zau lo hle a ni.

Buaina karah

Dan an bawhchhia nia puh an ni a, hremna na tak tawk mai thei dinhmunah an ding mek - media hrang hrangah an dan bawhchhiat nia sawi tarlan a nih avangin Manchester City hi an rilru a khingbai ve hle ang tih a sawi ngam.

Mahse, nikum khan Guardiola-a'n club thuneitute hnenah dilchhut takin thil a lo zawt tawh a, club thuneitu lam hian tihdik loh an nei lo nia an sawi avangin Spanish manager hian hna a thawk chhunzawm, tunlai boruak pawhin a tidanglam lo niin a lang.

Etihad Stadium-ah fans an in beng muk hle a, manager, player leh club neitu Sheikh Mansour an thlawp thu an au rual pui dual dual a, an player-te inkhel tiphur turin thawm an chhuah reng bawk, player lam pawhin fans duhna ang an pe let.

Goal a lut

Manchester City lamin goal khung turin an nghah rei a ngai lo, minute lina lekah Mahrez-a corner chu Rodri chuan a tauh lut nghal zawt, goal dang neih belh leh tur erawhin minute 36-na an nghah thlen a ngai thung.

Villa defender Calum Chambers-a'n Kevin de Bruyne through-ball chu tauh chhuah a tum, mahse ball hi per fuh tawk loin Erling Haaland-a'n a la hman. Goalkeeper Emi Martinez rawn tlan chhuakin Haaland hi a rawn khuap nghal.

Mahse, Haaland hi a chiai lo, box sir lamah ball la thlain, amah vengtu a paltlang hnuah ven loha rawn dawk chhuak Gundogan tan a siamsak. Jack Grealish-a penalty hlawhchhuah Mahrez-a'n khung belhin chak tur a chiang.

Famkim bik lo

Chawlhlawk hmain chak tur a chiang tawh a, mah se second half-ah Villa an beidawng lo. Bernardo Silva tihsual vangin Ollie Watkins-a'n remchang a hmuhah keeper Ederson thlengin a paltlang, an tlarhnung lai a phui lo.

Substitute Jhon Duran rawn lan chinah Villa an hlauhawm zual. Kum 19 mi Duran hian box chhunga a ball hmuh chu a malin a dang a, amah vengtu defender rawn inrawlh hmanin ṭha zetin a shot pawp, mahse goal bar a per hlauh.

Goal thum an chhuah hma avangin Unai Emery naute an ṭha tawk lo tih a hriat, chutihrualin si an phurh hnua an beih let danah erawh theihna leh beiseina sang tak an nei ngei a ni tih a lang chiang - Watkins leh Duran ten City tlarhnung kha hahchawl hman loin an siam thei.

Haaland hliam

Manchester City striker Erling Haaland chu half time-ah thlak a ni a, a hmun ruakah Argentina international Julian Alvarez a rawn lut. Guardiola chuan, "Chawlhlawk hma khan doctor ka bia, hliam a neih avangin a dinhmun kha 100% a ni lo.

"Goal thumin hma kan hruai tawh a, goal mamawh tak ni ila chuan ka thlak kher lo mai thei bawk. A dinhmun kan ngaichang ang," a ti. Tun hnaiah goal thun khawl Haaland hian minute 261 chhung goal a khung ta lo, boruak danglam hret chu a mamawh.

Champion tum inum chungchang sawi zuiin Pep chuan, "Kan chunga miten point an hloh laia hnehna lo chan hi chu a hlu bik. Arsenal hian keini aiin match khatin an khel tlem a, kan inkar hi point ruk anga sawi theih a ni tih kan hriat a ngai," a ti.