Man United tan Rashford leh Garnacho

Old Trafford-ah Leeds United-in Manchester United an chelh a, ni li hnuah club inhal pahnih hi Elland Road-ah inhmachhawn lehnghalin team pahnih danglamna chu Marcus Rashford a ni. Pathianni zan inkhelah Rashford chuan minute 10 chauh a awm tawh tihin hmahruaina goal a tauh lut a, minute nga hnuah substitute Alejandro Garnacho-a'n khung belh lehin Erik Ten Hag-a hote 2-0 in a chak.

Manchester United hian hun rei lote chhung pahnihna dinhmun luah mah se an hmelma Manchester City-in an lehthal lehnghal. Ten Hag-a hote hian point 46 hmuin pathumnaah an awm a, hmahruaitu Arsenal chu point nga chauhin an pha lo. Chutihrualin Red Devils hi Gunners aiin match hnihin an khel tam zawk.

Bang rinawm De Gea

Man United-in ball an chang tam a, goal chance erawh Leeds-in an ngah zawk. Leeds defender Maximilian Wober-a cross chu Patrick Bamford-a'n goal-ah petin keeper David de Gea-a'n a dang. Hemi per hi Leeds forward Crysencio Summerville-a'n chang hmasa ber mah se chiang takin a pet over ta thung.

Leeds tlarhnung aṭanga long ball satliah chu Man United defender Tyrell Malacia-a'n tauh let ṭha tawk loin Summerville-a'n a nang hman. Leeds winger Summerville shot-cross chu De Gea leh Harry Maguire ten an dang.

Second half-ah pawh Luke Shaw back pass chu Lisandro Martinez aiin Sommerville-a'n a chang zawk a, Leeds forward hian goal-ah pet mahse De Gea-a'n a dan sak. Spanish keeper De Gea a che ṭha a, goal a chhuah lo - Man United tana Peter Schmeichel-a clean sheet record (178) a nih rual.

Hei chauh hi a ni lo, De Gea hian Premeir League-ah match 400 a khel tling a, Gary Neville khelh zat khel chiahin Man United tana khel tawh zingah Ryan Giggs (632) leh Paul Scholes (499) te chauh a tluk lo.

Rashford bawk

FIFA World Cup zawh aṭang kha chuan Rashford-a'n goal khung a bansan thei lo a ni ber a, English striker zarah mikhual team-in point thum an hlawh chhuak. Man United tan Bruno Fernandes-a'n first half-ah chance ṭha a hlah a, Diogo Dalot-a'n crossbar a pet per bawk.

Ten Hag-a hoten pass ngah mah se tlarhnung lama ball an inpek tam avangin Leeds tlarhnung an ṭhawng pha meuh lo. Minute 80-naah vei lam aṭanga Luke Shaw cross ball duhthusam chu Rashford-a'n a tauh goal. World Cup hnuah Rashford hian Crystal Palace lakah chuah Premier League-ah goal a khung lo a, a bak league match-ah goal a khung vek.

Dutch manager Ten Hag pawhin, "A theihna sang tak ka pho chhuah theih hi ka beisei. Theihna sang tak a nei a, a thawhrim phawt chuan tun ai hian a la ṭha zawk ang. A ke dinglam, veilam leh lu hmangin goal a khung thei vek," tiin a fak hle. Rashford hian inelna hrang hrangah goal 21 a khung tawh a, league bikah goal 12 a khung tawh bawk.

Garnacho a rintlak

Dutch manager Ten Hag-a'n Alejandro Garnacho chungah rinna a nghat ngam tih a lang a, goal mamawh laiin Argentine rawlthar hian Old Trafford-a Leeds lama goal khungtu Jadon Sancho a thlak.

Kum 18 mi Garnacho hian theihna sang bik a nei tih pholangin Wout Weghorst-a ball pek chu la per dawrhin amah umtu Leeds defender Robin Koch lak aṭangin a fal nghal. Argentine forward hian box chhungah la lutin goal ṭha tak khung.

Garnacho hi a vanneih ṭum ni se goal dang khungna remchang a nei a, ball pet tura a insiam rei hret avangin hun ṭha a bawhbelh. Chutihrualin Argentine winger hian theihna sang tak a nei tih a lang a, kum lama a la naupang chungin amah vengtu tan a hnawksak ṭhin hle.

United hian hun tawp lamah Rashford leh Weghorst hmangin khung belhah inngai mah se offside vangin pawm a ni lo ve ve. Dutch forward Weghorst hian goal khung lo mah se hna ṭha takin a thawk. Marcel Sabitzer pawh midfield luah lumtu a ni a, United-in thlasik bazar an hmang ṭha a tih theih.

Ten Hag-a thluak

Man United defence laiah Maguire leh Luke Shaw te an ding dun a, a phui ṭha tawk lo. Ten Hag-a'n sawi danglam a ngai tih hriain minute 61-naah Lisandro Martinez a luhtir a, Tyrell Malacia la chhuakin mual vei lam sirah Shaw a dah.

Argentine defender Lisandro awm hnuah Sabitzer a tawlh fual leh hret a, tlarhnung a phui sawt. Second half-ah Weghorst chuan striker hna chelh tawh loin no. 10 hna a chelh zawk a, Dutch striker a tawlh hnun hret chhan hi Rashford-a'n tlarhmaa tlan luhna tur hmuh thawl a neih theih nan a ni.

Ten Hag-a game plan a fuh a, game plan thlak hret vangin Rashford-a'n goal a khung phah. Dutch manager hian Crystal Palace laka goal humhim nan bench aṭanga lut Garnacho chu a thlak leh a, Leeds lakah erawh Argentine winger hi thlak nawn a ngai tawh lo - chak ngemnghetna goal a khung.

Man United-in kartawpah Leicester City an hmachhawn dawn a, hemi hma hian February 15, Nilaini zanah Barcelona nen Nou Camp-ah Europa League knockout round playoff thawh khatna an khel ang. Ten Hag-a hote hi inelna lian paliah an la dam vek a, champion thei vek la ni mah se nomawi pakhat chawi pawh a harsa ang.