Super Bowl LVII-ah Kansas City Chiefs an ropui

Kansas City Chiefs chu kum li chhunga a vawi hnih nan National Football League champion an ni leh ta a, nimin khan Super Bowl 57 hmuhnawm takah 'comeback' ropui lantirin, 38-35 in Philadelphia Eagles chu an hneh.

Super Bowl 57-ah Chiefs hian rin an hlawh lo zawk a, Phoenix-a inkhelah hian hun tam zawk chu a hnufual zawk an ni - final quarter an khelh dawnin 27-21 in an hnufual zawk a, rilru huaisen tak tan lo chuan zamna tur chi a ni.

Mahse, kerek hliam vanga a talbuai chungin quarterback Patrick Mahomes a khel ṭha takzet a, veteran coach Andy Reid a zam lo - final quarter-ah Chiefs hian 17-8 a Eagles lehthalin, 38-35 in an chak.

Kum 27 mi Mahomes-a'n Chiefs a champion pui tiin sawi theih a ni a, American quarterback hi kar hmasa khan NFL Most Valuable Player-ah thlan a ni a, Super Bowl MVP-ah thlan ni bawkin, a champion bawk - kum 1999 hnua hetiang ti leh thei hmasa ber a ni.

Mahomes chuan, "Hei hi kan tawpna tur a la ni lo - ka hrilh tawh che u kha, engmahin khelmual pawnah min nawr chhuak lo ang! Ka khelhpuite hnenah lawmthu ka sawi duh a, mahni incho phur tawnin, kan theihtawp kan chhuah vek a ni," a ti a, a hlim hle.

NFL player ropui zinga chhiar tel ni reng tawh tur Mahomes chuan an coach Reid fak zuiin, "Coach awm tawh zinga ropui ber pawl a ni - chu chu mi zawng zawngin an hria a, chu chu tun hnaia Super Bowl pahnih a lak hian a nemnghet leh zual a ni," a ti.

Mahomes chuan sawi zawmin, "Player-te kan ṭhat dan bera kan khelhchhuah theihna tura min puitu neih hi a nuam a, a tana Super Bowl chawi hi a châkawm lehzual - kan puitlin thei hi a lawmawm hle a ni," a ti a, an chak chu anmahni leh club tan mai ni loin, Coach tan a nih thu a sawi.

Kum 64 mi Andy Reid hian tun Super Bowl-a an hneh tak Philadelphia Eagles hi kum 14 zet chu a lo enkawl tawh a, champion puitu Mahomes chu a fak nasa hle.

Reid chuan, "Player awm tawh zinga ropui ber nih a duh a, chutiang a nih theih nan chuan a bei bawk. Mahse, mahni infak leh sawi mawi awm loin, inngaitlawm takin a ti ṭhin.

"Quarterback ṭha chu a bula khelte mai bakah, coach thlengin an ṭhat phah ṭhin a, hna ropui tak a thawk a ni," a ti a, Mahomes vanga champion an ni tih a hai lo.