Napoli tan Serie A nomawi a hnai

Italian football inelna sang ber Serie A champion ni turin Napoli dinhmun a ṭha chho ta hle. Pathianni zan khan Naples club hian an mikhual Cremonese chu 3-0 a sawpin table chung berah an dinhmun an sawhnghet.

Serie A match 22 an khelh aṭangin Napoli hian point 59 an hmu a, anmahni hnaih bertu Inter Milan chuan point 43 an hmu thung, an inthlauhna hi point 16 teh meuh a ni tawh, nizan khan Inter hian match an khelh tlemna an khel, an chak chuan an inkar a zim hret ang.

Khvicha Kvaratskhelia, Victor Osimhen leh Eljif Elmas te goal hmangin Napoli hi an chak, tun season Serie A match 19 zetah hnehna an chang tling ta a, thla hmasa maia Coppa Italia lama an ngam loh Cremonese lakah harsatna an tawk lo.

Napoli coach Luciano Spalletti chuan, "Naples khawpui leh a chhunga mipui chengte hian kan kaihza tha an veng tlat a, chu chu kan chakna hnar pawimawh tak pakhat zinga mi a ni tih chiang takin kan hria, kan khelmual chhunga luh hian a hriat.

"Thla hmasa mai khan Cremonese hian cup inelnaah min hneh, tunah erawh kan intawn hmasak nen chuan a boruak a danglam. Ka naute hian an theihna zawng zawnga an khelh hi chuan team dang hneh turin theihna kan nei," a ti.

Napoli tan hian Osimhen chuan season duhawm a hmang mek. Nigeria international hian league goal 17 a khung ta, kum 24 mi chauh la niin vanglai a hmang chho dawn. European club lian dangte chil tiputtu a ni mek.

Spalletti chuan, "A rilru put hmang hian min hneh ṭhin, midangte tan hmun siamsak a thiam a, goal khung tura remchang a neihin a hlah mai mai lo bawk," tiin a striker Osimhen a dahsang hle, season tharah pawh chelh ngei a duh ang.

Diego Maradona hunlai khan Napoli hian Serie A nomawi an lo chawi tawh, a hnu lamah an la champion leh ngai lo. Legend Maradona a thi tawh a, a lim pawh Napoli khelmualah dah niin, an khelmual pawh Maradona hming chawiin an thlak.

Maradona awm tawh lo mah se an thinlungah a la cham reng, kuminah hian an legend sulhnu ang neih leh theihna remchang an nei dawn niin a lang, season tir lama rin hlawh lo leh player ṭha an chhuah nasat avanga buai tura ngaih kha an champion dawn niin a lang ta.

Pathianni zan Serie A inkhel dangah Juventus chuan Fiorentina 1-0 in an hneh. Old Lady goal neih chhun hi midfielder Adrien Rabiot khung a ni a, point thum hlu tak hlawh chhuakin table-ah pakuana dinhmun an luah ta bawk.

January thla khan Juve hi an dan bawhchhiat hailan a ni a, hei vang hian point 15 an paihsak. An tan champion beisei ngam chi a ni tawh lo a, season thara Champions League khelh pawh beisei chi a ni rih lo - European football hrim hrim erawh a la beisei ngam.