European Super League: Ruahmanna thar nen an lo lang!

Fan-te dodalna nasa tak avanga bansan tak European Super League chuan thawm an rawn nei leh ta a, ESL promote tu company A22 Sports Management chuan ESL-ah chuan a ngheta khel bik tur an awm loh thu an sawi.

Ruahmanna hmasa zawkah kha chuan ESL hi club hausa tawh sate hausak belhna tur ni berin a lang a, season tina khel tura tih an nih bik bawk si avangin, thlawp a hlawh lo hle.

Mahse, A22 chief executive Bernd Reichart chuan an ruahmanna thar puangzarin, ESL-ah chuan khelmuala an result a zir chauha club an tel theih tur thu a sawi a, mipui hip thar leh an tumna ni berin a lang.

Reichart chuan, "European football innghahchhan ber chu a nghing mek a, inthlak danglam a hun tawh a ni. Club-te hi risk latu berah ṭangin, an dinhmun a duhawm lo hle. Mahse, thil thlak danglam a nih dawn a, an chhehvela thil tam tak a nghin lai pawhin ngawi reng tura dan beh an ni," a ti.

Ruahmanna hmasa

ESL ruahmanna hmasa ber hi kum 2021 khan duan niin, team 20 inelna tura tih a ni a, a tirah founding member 12 awmin, club dang pathum la sawm belh leh tur a ni a, a bak club dang panga erawh tualchhung football-a an khelh dan a zira ESL khel tur an ni thung.

He league hi khawvela club langsar ber ber Arsenal, Chelsea, Liverpool, Manchester City, Manchester United, leh Tottenham Hotspur (England), Inter Milan, Juventus, leh A.C. Milan (Italy), leh Atletico Madrid, Barcelona leh Real Madrid (Spain) ten a tira an ruahman tlan a ni.

Mahse, fan-te dodalna a nasat em avangin club tam zawk an inhnukdawk a, mahse, vawiin thleng hian Real Madrid, Barcelona leh Juventus te chu ṭang hoin, ESL hi siam an la tum reng thung.

A bik takin English club tel duh lo hian sum leh paiah nasa takin a nghawng tel ang tih a chiang a, mahse, tuna he ruahmanna siamtu Reichart chuan, "Ram pakhatin ESL hi an zawm ve duh loh avang maiin kan hmachhawp hi a thamral lo ang," a ti.

Ruahmanna thar

ESL hi ruahmanna hmasa zawkah team 20 chauh inelna tur ni mah se, ruahmanna thar berah chuan team 60-80 inelna tura duan a ni a, club tinin mahni tualchhung league khel reng chungin, a tlem berah season khatah ESL match 14 tal khel tura ruahmanna siam a ni.

A22 lam hian eng ang takin nge he league hi an kalpui dawn, a kalphung tak tak puanzarna hi an nei lem lo. Football khawvela thuneitu sang ber FIFA leh European football-a roreltu UEFA chuan he inelna hi na takin an lo dodal tawh.

Hetihlai hian ESL buatsaih tumte chuan, FIFA leh UEFA chu ESL tel tum club leh player te a vau danah inelna kalphung an bawhchhia niin an sawi a, European Court of Justice report erawh chuan FIFA leh UEFA hi a chhan thung.

European Court of Justice chuan, "EU competition law ang thlapin an kal a ni," tiin FIFA leh UEFA an chhan a, nipui chho velah chuan thutlukna tak an siam hman tura beisei a ni.

Sawiselna chu

Hetiang boruak karah hian A22 erawh an chawlh phah lo a, indawrna hrang hrang an kalpuiah club-te dan beh an nih dan pawh an sawilan thu an sawi a, "Tih tur tam tak a la awm a, hma kan la zel ang," an ti.

La Liga president Javier Tebas chu ESL sawisel langsar ber pakhat a ni a, Spanish top flight league hotupa chuan, "Chinghne koham ang mai an ni a, European football chu dawi at tumin tawnhriat nei ṭha ang maiin an inlantir a ni," a ti.

Hei bakah hian La Liga chuan thuchhuah siamin, ESL din tumte thuchhuah chu tualchhung league tana thil hlauhawm tak a nih thu an sawi a, "European football chu club liante tan chauha hlawkna tura siamrem an tum a ni," an ti.

Football Supporters' Association chief executive Kevin Miles pawhin ESL chu na taka sawiselin, "Thlarau nei loa leng vel ESL chuan awmze nei loin thu an sawi leh ta," a ti a, kal dan mumal sawi tur nei loa thle vel mai mai niin ESL chu a sawi bawk.

Kan ti tawh!

ESL thawm na tak karah European Club Association (ECA) pawhin thuchhuah an siam a, "A tak ramah chuan, midang tih entawna an ruahmanna hi kalpui turin thlir ho a lo ni daih tawh a, mahse, kum 2019 khan inlungrual takin kan lo nuai bo daih tawh," an ti.

Paris St-Germain president Nasser Al-Khelaifi-a'n President dinhmun a chelhna, ECA chuan ESL chu an dodal tlat thu an sawi a, European football-in hma a sawn theihna tur atana hmalakna an neih reng thu an sawi bawk.

Nikum khan UEFA chuan Champions League kalphung thlak danglam turin a lo pawm tawh a, 2024-25 season aṭang chuan group stage-a inel ṭhin team chu 32 aṭangin 36-ah a kaisang dawn a ni.

Ruahman dan chuan group stage-ah team ṭhen hrang tawh loin, team 36 chu an awm vek ang a, club tinin match riat ṭheuh, home leh away-ah match li ve ve an khel ang a, top eight chuan knockout round lutin, pakuana aṭanga 24-na te chuan playoff hmangin last 16 lut tur an zawng ve

leh ang.

UEFA chuan he ruahmanna hi Europa League leh Europa Conference League-ah pawh hman a nih tur thu an sawi - team 36 ve ve thoin an khel ang a, Europa-ah chuan league stage-ah match riat tho awmin, ECL-ah chuan league stage-a match ruk awm turin ruahmanna siam a ni thung.